Դատախազություն են հրավիրվել Վալերիյ Օսիպյանը և կինը. Factor.am
Հայաստանի Հանրապետության նախկին ոստիկանապետ, ոստիկանության գեներալ-մայոր Վալերիյ Օսիպյանը և կինը՝ Լուսինե Թադևոսյանը, Գլխավոր դատախազության ապօրինի ծագում ունեցող գույքի բռնագանձման գործերով վարչություն են հրավիրվել։ Այս մասին հայտնում է Factor.am-ը:
Նշվում է, որ վարչությունը նրանց վերաբերյալ ուսումնասիրություն է կատարել, հրավիրում է ծանոթանալու գործի նյութերին, ներկայացնելու դիրքորոշում, ինչպես նաև՝ հայտարարագիր: «Միաժամանակ, հայտնում եմ, որ ներկայանալ անհրաժեշտ է 2026 թվականի հունվարի 19-ին՝ ժամը 17:45-ին, իսկ նշված օրը և ժամին ներկայանալու անհնարինության դեպքում հարկավոր է օրը և ժամը համաձայնեցնել»,- նշվում է հրապարակային ծանուցման մեջ։
Հիշեցնենք՝ 2018 թվականի մայիսի 10-ին Հայաստանի վարչապետ Նիկոլ Փաշինյանի առաջարկությամբ և Հայաստանի նախագահ Արմեն Սարգսյանի հրամանագրով Վալերիյ Օսիպյանը նշանակվել էր Հայաստանի ոստիկանապետ։ 2019 թվականի սեպտեմբերի 18-ին Հայաստանի վարչապետ Նիկոլ Փաշինյանի միջնորդությամբ ազատվել էր ոստիկանապետի պաշտոնից։ Նույն օրը երեկոյան նշանակվել էր Հայաստանի վարչապետի գլխավոր խորհրդական, սակայն մեկ ամիս անց ազատվել նաև այդ պաշտոնից։ Դրանից հետո Օսիպյանին մի քանի անգամ նկատել են ընդդիմության հավաքների ժամանակ։
The post Դատախազություն են հրավիրվել Վալերիյ Օսիպյանը և կինը. Factor.am first appeared on MediaLab Newsroom-Laboratory.