Винисиуснинг янги шартнома талаби "Реал"ни қийнаб қўйди...
«Реал» ҳужумчи Винисиус Жуниор билан янги шартнома масаласида ҳали-ҳамон бир қарорга келолмаяпти. Мадридликлар 25 ёшли юлдуз билан келишувни узайтиришга умид қиляпти, аммо музокаралар кутилганидек тез кетмаяпти.
El Nacional нашри хабарига кўра, асосий тўсиқ — маош борасидаги фарқ. Винисиус йилига 30 миллион евро атрофида ойлик талаб қиляпти, «қироллик клуби» эса ҳозирча бундай суммага рози бўлишга тайёр эмас. Бу рақам «Реал»нинг ички маош сиёсати ва жамоадаги баланс масаласини ҳам ўртага чиқаради — катта маош бир ўйинчи билан чекланиб қолмайди, бутун кийиниш хонасига таъсир қилади.
Энг қизиғи, Вини музокаралар чўзилиб кетишини истамаяпти. Шу сабабли у клуб олдига шарт қўйгани айтилади: яқин бир неча ой ичида масала ижобий ҳал бўлиши керак. Агар томонлар келишувга келолмаса, футболчи жамоани тарк этиш вариантини ҳам очиқ қолдиряпти. Қисқаси, бу ерда “кейинроқ гаплашамиз” деган режим ишламайди — вақт ишлаяпти.
Мавсум кўрсаткичлари ҳам Винисиуснинг ўзини ишончли ҳис қилишини тушунтириб беради: у барча турнирларда 30 та ўйин ўтказиб, 7 та гол ва 11 та голли узатма қайд этган. Ҳозирги амалдаги шартномаси эса 2027 йил ёзигача мўлжалланган.
Энди «Реал» учун асосий савол битта: Винисиусни жамоада ушлаб қолиш учун молиявий қадам ташланадими ёки клуб ўз принципларида қаттиқ турадими. Мухлислар учун эса бу мавзудаги ҳар бир янгилик — финалга яқинлашаётган сериалга ўхшайди: охири тезроқ келсин дейсан, лекин ҳар серияда нерв бор.