Høgste handelsoverskot på nesten eitt år
Handelsoverskotet enda på nesten 76 milliardar kroner i januar 2026. Det er 77 prosent meir enn i desember og det høgste nivået sidan februar i fjor, viser tal frå Statistisk sentralbyrå (SSB).
– Dette er veldig sterke tal for eksporten, som er med på å løfte norsk økonomi. No er handelsoverskotet på 76 milliardar i månaden, og vi må huske på at før pandemien var 15–20 milliardar bra.
Det seier sjeføkonom Kyrre Knudsen i Sparebank 1 Sør-Norge til NRK.
Årsaka er høgare eksportinntekter frå olje og gass, samtidig som importverdien fall til sitt lågaste på fleire år, skriv SSB.
Eksportinntektene til Noreg enda på 154,5 milliardar kroner i januar 2026. Det er ein auke på 11,3 prosent.