Жим Керри Франциянинг фахрий “Сезар” мукофотини қабул қилди
Америкалик актёр Жим Керри Франция миллий кино мукофоти — фахрий “Сезар” билан тақдирланди. Мукофотни унга “Eternal Sunshine of the Spotless Mind” фильмида бирга ишлаган режиссёр Мишель Гондри топширди.
Маълум қилинишича, Керри миннатдорлик нутқини французча талаффузда билдирган. Унинг сўзларига кўра, бобосининг катта бобоси Марк-Франсуа Керри Франциянинг Сен-Мало портидан Канадага кўчиб ўтган, ўзи эса кейинчалик Лос-Анжелесга йўл олган.
“Мен билган энг кулгили инсон — отам Перси Жозеф Керрига раҳмат. У менга муҳаббат, саховат ва кулгини қадрлашни ўргатди. Агар омад сизга кулиб боқишини истасангиз, аввал ўзингиз унга кулинг. Бу осон эмас, лекин ҳаракат қилиш керак. Бу лаҳзани умрбод эслаб қоламан. Мен унга доим кулиб боқаман. Ҳаётим — жаннат”, деди актёр.
Аввал фахрий “Сезар” мукофоти Жулия Робертс, Кристофер Нолан, Дэвид Финчер, Кейт Бланшетт, Роберт Редфорд, Пенелопа Крус, Жорж Клуни каби кино санъати вакилларига топширилган.