Игор Тудор "Тоттенхэм"даги инқироз ва сифат етишмаслиги ҳақида гапирди
Англия Премьер-лигасининг 28-тури доирасида бўлиб ўтган "Фулхэм"га қарши Лондон дербиси (1:2) "Тоттенхэм" учун кутилмаган мағлубият билан якунланди. Ўйиндан сўнг жамоа устози Игор Тудор матбуот анжуманида жамоадаги тизимли муаммоларни яшириб ўтирмади.
"Ҳар бир чизиқда сифат етишмаяпти"
Мураббийнинг фикрича, жамоа ҳозирги кунда ҳар томонлама оқсамоқда. "Вазият анча чигал. Муаммолар етарлича, мен сизларга бирор янгилик айта олмайман. Ҳозирги пайтда ҳар биримиз ички куч топиб, оёққа туришимиз шарт. Бизда гол уриш учун ҳужумда маҳорат, марказда ўйинни тезлаштириш учун сифат ва ҳимояда сабр-матонат етишмаяпти. Бу ҳақиқатан ҳам жуда ғайритабиий ҳолат", — дея таъкидлади Тудор.
Мувозанат излаб: Ижодкорликми ёки мустаҳкам ҳимоя?
Таркиб борасида тўхталар экан, мураббий жамоада мувозанат йўқолганини очиқ тан олди. Унинг қарашига кўра, агар майдонга кўпроқ креатив ва ижодкор футболчилар туширилса, ҳимоя чизиғи заифлашиб қолмоқда. Агар бор эътибор жисмоний кураш ва мудофаага қаратилса, ҳужум ташкил қилишда муаммолар юзага келмоқда.
Хавфли ҳудудга яқин "Тоттенхэм"
Тудор жамоа тезроқ ўз йўлини ва ўйин услубини аниқлаб олиши зарурлигини қайд этди. Айни дамда "Тоттенхэм" 29 очко билан мусобақа жадвалининг пастки қисмида — 16-ўринда қолмоқда. Уларни мағлуб этган "Фулхэм" эса 40 очко билан 9-поғонага кўтарилиб олди.
Сизнингча, Игор Тудор "Тоттенхэм"ни ушбу мураккаб вазиятдан олиб чиқиб кета оладими ёки жамоага янги нафас керакми?