Хонанда Райҳон ертўладаги қизи ҳақидаги гапларга жавоб қайтарди
Ўзбекистон эстрада юлдузи Райҳон шахсий ҳаёти ва ижоди атрофида тарқалган турли миш-мишлар ҳамда танқидларга нисбатан ўз муносабатини билдирди. Хонанда ижтимоий тармоқларда ўзи ҳақида ёзиладиган ноўрин гаплар, хусусан, қизини ертўлада сақлаши ҳақидаги асоссиз иддаолар уни қанчалик ранжитишини яширмади.
Райҳоннинг таъкидлашича, у танқидий фикрларни жуда оғир қабул қилади. Ҳатто юзлаб ижобий изоҳлар орасида битта салбий фикрга кўзи тушса ҳам, узоқ вақт тушкунликка тушиб қолади. Хонанда ўз фаолияти давомида дуч келган айрим нохуш вазиятларни эслаб, матбуотда унинг концерт чипталари сотилмаётгани ва ижодий инқирозга юз тутгани ҳақида ёзилган мақолалар уни қаттиқ хафа қилганини айтди. Бундай асоссиз хабарлар сабабли у ҳатто айрим нашрларни кузатишни тўхтатишга мажбур бўлган.
Санъаткор ўзининг биринчи турмуши ҳамда DJ Piligrim билан боғлиқ бўлган шов-шувли можаролар ҳақида ҳам тўхталиб ўтди. Унинг сўзларига кўра, омма олдида яшаш ва доимий кузатув остида бўлиш осон эмас, айниқса, шахсий ҳаётга оид ёлғон маълумотлар тарқалиши инсон руҳиятига салбий таъсир кўрсатади. Райҳон мухлисларини ҳар қандай хабарга кўр-кўрона ишонмасликка ва санъаткорларнинг шахсий чегараларини ҳурмат қилишга чақирди.