Ларижани: Исроил Эрон ва Озарбайжон ўртасида фитна қўзғатмоқда
Али Ларижани — Эрон Олий Миллий Хавфсизлик Кенгаши котиби — минтақадаги вазиятга доир баёнот бериб, Исроил Эрон ва Яқин Шарқдаги қатор давлатлар ўртасида зиддият келтириб чиқаришга уринмоқда, деб таъкидлади.
Унинг сўзларига кўра, Исроил айрим давлатлар ўртасида ишончсизлик пайдо қилиш ва можаро қўзғатиш учун турли айёрлик ва фитналардан фойдаланмоқда. Айниқса, бу ҳаракатлар Эрон ва Яқин Шарқ мамлакатлари, жумладан Озарбайжон ўртасида муносабатларни издан чиқаришга қаратилгани айтилди.
Ларижани таъкидлашича, Теҳроннинг асосий сиёсати қўшни давлатлар билан тинч ва дўстона муносабатларни сақлаб қолишдан иборат. Шу сабабли Эрон раҳбарияти минтақа мамлакатлари билан ўзаро ишончни мустаҳкамлашга алоҳида эътибор қаратади.
“Бизнинг стратегиямиз — қўшниларимиз билан дўстликни сақлаш, ўзаро ишончни мустаҳкамлаш ва турли шубҳалар ҳамда зиддиятлардан қочишдан иборат. Агар миллий хавфсизлигимизга қўшни давлатлар ҳудудидан таҳдид қилинмаса, биз бундай муносабатни давом эттирамиз”, — деди у.
Шу билан бирга, у Эрон Озарбайжон билан ҳеч қандай муаммога эга эмаслигини таъкидлади. Аммо Эронга қарши ҳар қандай таҳдид ёки босим бўлган тақдирда, Теҳрон бунга муносиб жавоб қайтаришини билдирди.
Ларижанининг фикрича, минтақадаги барқарорликни сақлаш учун давлатлар ўртасида ўзаро ишонч ва мулоқот муҳим аҳамият касб этади. У айрим ташқи кучлар томонидан можароларни қўзғатишга қаратилган уринишлар минтақа хавфсизлигига жиддий таҳдид солиши мумкинлигини ҳам қайд этди.