У Беларусі сёння пройдзе „Марш адзінства”
Беларуская апазіцыя сёння плануе правесці „Марш адзінства”. Асноўным лозунгам дэманстрацыі стане „Адзін за ўсіх, і ўсе за аднаго”. Такім чынам удзельнікі акцыі намераны выказаць салідарнасць з затрыманамі падчас папярэдніх акцый пратэстоўцамі.
Фота Reuters
Акрамя таго, яны маюць намер запатрабаваць вызвалення палітыкаў, якія знаходзяцца ў СІЗА ўжо некалькі месяцаў па розных справах. Гаворка ідзе пра блогера Сяргея Ціханоўскага, недапушчанага да выбараў прэзідэнта Віктара Бабарыку і апазіцыянера Мікалая Статкевіча. Застануцца і старыя патрабаванні: пратэстоўцы хочуць адстаўкі Аляксандра Лукашэнкі і не прызнаюць вынікі прэзідэнцкіх выбараў, дзе, як сцвярджаюць у ЦВК, ён набраў 80% галасоў.
Акцыі пратэсту запланаваныя ў многіх іншых беларускіх гарадах. Напярэдадні ў Менску прайшлі некалькі дэманстрацый, у тым ліку жаночы марш. Міліцыя паведаміла аб затрыманні больш за 30 чалавек, 9 з іх, гэта студэнты, пакінутыя пад вартай да суда. Ім ставяць у віну ўдзел у няўзгодненай акцыі. Масавыя пратэсты ў Беларусі працягваюцца ўжо амаль месяц.