Лідчына ў мастацкай літаратуры
Cвоеасаблівым брэндам Лідскай раённай бібліятэкі імя Янкі Купалы стала правядзенне штогадовых Лідскіх чытанняў.
Выступленні ўдзельнікаў канферэнцый заўсёды адзначаюцца навізной узнятых тэм, глыбінёй і шырынёй аўтарскага светапогляду. Прыемна, што сярод дакладчыкаў прысутнічаюць не толькі краязнаўцы, пісьменнікі, журналісты Лідчыны, супрацоўнікі гісторыка-мастацкага музея, выкладчыкі і бібліятэкары, але і навучэнцы школ, ліцэяў, гімназій і каледжаў Лідскага раёна. Лідскія чытанні даюць ім магчымасць прадставіць уласныя даследчыя працы.
22 красавіка 2022 года ў Лідскай раённай бібліятэцы імя Янкі Купалы адбыліся ІХ Лідскія чытанні, у рамках якіх прайшла навукова-практычная канферэнцыя “Лідчына ў мастацкай літаратуры”.
З прывітальным словам звярнуўся намеснік дырэктара дзяржаўнай установы культуры “Лідская раённая бібліятэка імя Янкі Купалы” Алена Быстрыцкая, каб пажадаць удзельнікам канферэнцыі плённай і творчай працы.
У рамках мерапрыемства прагучала 11 дакладаў. Перш за ўсё прысутныя пазнаёміліся з дакладам “Лідскія пісьменніцы XVIIІ – XIX стагоддзяў”, які прадставіў краязнаўца і гісторык Леанід Лаўрэш.
Пра вобраз Лідчыны ў зборніках лідскіх паэтаў распавяла настаўніца рускай мовы і літаратуры ДУА “СШ № 11 г. Ліды” Наталля Анашкевіч. У якасці падарунка раённая бібліятэка атрымала ад Наталлі Мікалаеўны кнігу “Праваслаўныя храмы Лідчыны: гісторыя і сучаснасць”.
Галоўны бібліёграф Лідскай раённай бібліятэкі імя Янкі Купалы Галіна Курбыка правяла агляд кніг пра Лідчыну ў гады Другой сусветнай вайны.
Адметнай асаблівасцю гэтай канферэнцыі стала вялікая колькасць дакладаў, якія прадставілі студэнты першага курса (спецыяльнасць “Пачатковая адукацыя”) гуманітарнага аддзялення Лідскага каледжа УА “Гродзенскі дзяржаўны ўніверсітэт імя Янкі Купалы”. Так, Ус Анастасія распавяла аб сапраўдным майстры мастацкага слова – Дануце Бічэль. Асаблівую цікавасць у прысутных выклікала знаёмства з творчым і жыццёвым шляхам беларускіх пісьменніц Ірыны Багдановіч, Хрысціны Лялько і Ганны Серахан, пра якіх паведалі Дудзевіч Валерыя, Сафрановіч Анжаліка і Яневіч Анастасія. Для некаторых навучэнцаў гэта быў першы вопыт выступлення на канферэнцыі, але яны не згубіліся і вельмі годна данеслі аўдыторыі свой матэрыял.
У час канферэнцыі былі агучаны такія тэмы як: “Чарговая разгадка загадкавай асобы Валянціна Таўлая ў творах мастацкай літаратуры” навуковым супрацоўнікам ДУ “Лідскі гісторыка-мастацкі музей” Алесем Хітруном; “Віктар Гамуліцкі і яго кніга “Сёмы аман егамосці пана Макрэцкага”. Аповесць з часоў Сасаў” пісьменнікам і краязнаўцам Станіславам Суднікам; “Шляхамі творчасці Смарагда Сліўко” паэтэсай Ірэнай Сліўко; “Паяднаныя словам: літаратурнае аб’яднанне “Суквецце”” паэтам і журналістам Алесем Мацулевічам.
Канферэнцыя атрымалася насычанай і цікавай. Важна адзначыць, што па выніках канферэнцыі супрацоўнікамі Лідскай раённай бібліятэкі імя Янкі Купалы будзе выдадзены зборнік дакладаў “IХ Лідскія чытанні”.
Аксана Шпак, Беларускае Радыё Рацыя
Фота аўтара