У Беластоку выпякалі будучыню для камяніцы па вуліцы Млыновай
У Беластоку ў межах праекта «У выратаванне старых дамоў» ля старой камяніцы па адрасе: вул. Млыновая, 2 , прайшоў кулінарны майстар-клас па прыгатаванні традыцыйнага беластоцкага хлеба – бялыса.
Пра тое, як такі варштат можа дапамагчы будынку 19-га стагоддзя ў аварыйным стане, разважае гісторык, аўтар і даследчык горада Веслаў Урубель:
-Гэта спроба адкрыцця, напаміну, захавання, папулярызацыі культурнай спадчыны, ужо забытай, якая ў Беластоку знікла. Адначасова мы хочам усвядоміць, што гэтая зніклая культура была прадстаўлена якраз у гэтых дамах, якія зараз пустуюць, сталі руінамі. Гэта такі маленькі крок у мінулае.
Значэнне мерапрыемства для Беластоку ацаніла арганізатар, сябра Праўлення культурна-асветніцкай асацыяцыі WIDOK Магдалена Гадлеўская-Сіверская:
-Нашае аб’яднанне праводзіць праект «У выратаванне старых дамоў». Сённяшняе спатканне вакол габрэйскай кухні, а таксама традыцыі міжваеннага перыяду, трошкі вакол гісторыі, і вуліцы Млыновай і дому нумар 2, ля якога адбываецца гэты пікнік, для таго, каб людзі даведаліся больш такім прывабным, цікавым чынам.
Камяніца па вуліцы: Млыновая, 2 уваходзіць у спіс з 13-і дамоў, адзін з якіх па выніку грамадскага галасавання ў межах праекту «У выратаванне старых дамоў», атрымае фінансанне з гарадскога бюджэту і будзе рэвіталізаваны для патрэбаў горада.
Беларускае Радыё Рацыя
Artykuł У Беластоку выпякалі будучыню для камяніцы па вуліцы Млыновай pochodzi z serwisu БЕЛАРУСКАЕ РАДЫЁ РАЦЫЯ.