Уладзімір Хільмановіч: Няма ранейшага трымцення перад спартовымі форумамі
Пачынаецца футбольны чэмпіянат свету. Пра мундыяль паразмаўлялі з нашым рэдакцыйным калегам, фанатам спорту і футболу - Уладзімірам Хільмановічам.
Artykuł Уладзімір Хільмановіч: Няма ранейшага трымцення перад спартовымі форумамі pochodzi z serwisu БЕЛАРУСКАЕ РАДЫЁ РАЦЫЯ.
Сёння, 20-га лістапада ў Катары пачынаецца чэмпіянат свету па футболе. Спаборніцтвы працягнуцца амаль месяц – пераможца вызначыцца 18 снежня. Пра мундыяль паразмаўляем з нашым рэдакцыйным калегам, фанатам спорту і футболу – Уладзімірам Хільмановічам.
РР: Што ты адчуў, калі даведаўся, што ЧС адбудзецца ў Катары?
Уладзімір Хільмановіч: Найперш адчуў расчараванне, таму што ў апошнія дзесяцігоддзі няма ранейшага трымцення перад спартовымі форумамі, не было яго і перад ЧС у Расеі 2018 года, няма адчування свята і перад гэтым мундыялем. Няма, бо ўсплылі відавочныя факты, што гэтыя першынствы – права на іх правядзенне, былі аддадзены Расеі і Катару ў выніку розных карупцыйных схемаў. Увогуле, ФІФА – гэта міжнародная арганізацыя, якая, можна сказаць, пагрузла ў карупцыйных скандалах. Таму няма адчування той радасці, і зважаючы на вайну, якая ідзе на тэрыторыі Украіны, і на рэпрэсіі, якія ідуць на тэрыторыі Беларусі. Таму я цалком разумею тых заўзятараў, якія байкатуюць гэты ЧС ці амаль не будуць яго глядзець. Але разумею і тых, хто будзе глядзець матчы мундыялю, каб нейкім чынам рэлаксавацца ад гэтай змрочнай рэчаіснасці.
РР: ФІФА заўсёды заяўляе, што далёкая ад палітыкі. Але ўсё ж такі Расеі не будзе на ЧС, яе адхілілі.
Уладзімір Хільмановіч: Футбол ужо даўно больш чым проста гульня, гэта сацыяльная з’ява, а ў некаторых аспектах – і грамадска-палітычная. Я мяркую, што чыста фармальна было слушным гэтае адхіленне. З іншага боку, пэўная прыкрасць засталася, бо я асабіста перакананы, што Расея і так не выйшла б на гэты мундыяль. Пераадолець двух супернікаў – Польшчу, а потым яшчэ і Швецыю, наўрад ці расейскай дружыне было пад сілу. З гэтага гледзішча можа шкада, што яе адхілілі такім чынам.
РР: Хто твой фаварыт на гэтым ЧС?
Уладзімір Хільмановіч: Мяркую, што еўрапейцы не на сваім кантыненце не стануць чэмпіёнамі. Буду, напэўна, банальным, сказаўшы, што галоўнымі фаварытамі лічацца Бразілія і Аргенціна. Абедзве каманды без слабых месцаў. Сённяшнія чэмпіёны свету – французы, якіх таксама называюць у ліку галоўных фаварытаў, усё ж такі складуць свае паўнамоцтвы і можа быць нават задоўга да вырашальных паядынкаў гэтага турніру.
Цалкам гутарку слухайце ў далучаным гукавым файле:
Беларускае Радыё Рацыя
Artykuł Уладзімір Хільмановіч: Няма ранейшага трымцення перад спартовымі форумамі pochodzi z serwisu БЕЛАРУСКАЕ РАДЫЁ РАЦЫЯ.