У Штутгарце «Купалаўцы» пакажуць прэм’еру трох чытак спектакляў
KUPALAUCY: KUO VADIS? — гэта новы тэатральны праект незалежнай тэатральнай групы «Купалаўцы» і нямецкай культурніцкай арганізацыяй KuB / Kulturverein Belarus. Праект мае форму творчых лабараторый i прасоўвае маладую беларускую лiтаратуру i драму, сумесную працу памiж беларускiмi i нямецкiмi спецыялiстамi.
Ужо 26 лістапада 2022 адбудзецца прэм’ера трох чытак спектакляў беларускіх аўтараў і рэжысёраў у тэатры Рампэ ў Штутгарце. Таксама ў фармаце жывога стрыма спектакль будзе дэманстравацца на YouTube-канале “Купалаўцаў”.
Праект ажыццяўляўся ў тры этапы. Першы — ладзіўся ў кастрычнiку 2022 года. У яго межах тры тандэмы маладых аўтараў і рэжысёраў – Сяргея Лескеця і Рамана Падалякі, Ганны Златкоўскай і Андрэя Саўчанкi, Аляксандра Чарнухi і Марыны Мiхальчук – былi запрошаны да ўдзелу ў першай лабараторыi KUPALAUCY: KUO VADIS?. У вынiку сумеснай працы творцаў над ужо iснуючым лiтаратурным матэрыялам былi створаны тры новыя п’есы: «Шэпт», «Гісторыя ўцякачкі. Я вярнуся?» і «Свята кабана».
ШЭПТ
Фатограф і даследчык Сяргей Лескець на працягу дзесяці гадоў дакументаваў традыцыю ацалення шэптам на беларускiм Палессі – у мясцінах, дзе гэтая практыка яшчэ захавалася i дасюль застаецца жывой. Фотаздымкi, нататкi i размовы з шаптухамi сталi асновай для кнігi “Шэпт”, якая выйшла ў 2022 годзе. У супрацоўніцтве з рэжысёрам “Купалаўцаў” Раманам Падалякам кнiга Сяргея была ператворана ў п’есу – своеасаблiвае падарожжа да вясковай культуры, магii шэпту і каранёў.
ГІСТОРЫЯ ЎЦЯКАЧКI. Я ВЯРНУСЯ?
У сваім адкрытым дзённіку аўтарка Ганна Златкоўская разважае пра эмiграцыю як надзвычай складаную траўму: страх, страта дому, размыванне ўласнай ідэнтычнасці, але таксама прысутнічаюць надзея і набыццё нечаканай сілы. У тандэме з рэжысёрам Андрэем Саўчанкам на аснове гэтага дзённіка была створана новая, амаль дакументальная п’еса. Уцякачка – гэта i сама Ганна, i адначасова многiя iншыя эмiгранты, якiя шукаюць зямлю пад нагамi i пачуццё бяспекi.
СВЯТА КАБАНА
У маленькім горадзе пачынаюць паміраць свінні – падзея ўвогуле звычайная, але бюракраты метадычна ператвараюць яе ў сапраўднае ідэалагічнае супрацьстаянне. Гэты сюжэт малады аўтар Аляксандр Чарнуха разварочвае вiдовiшчнай каруселлю вобразаў i падзей у сваёй дэбютнай кнiзе “Свiннi” (2021). У супрацоўнiцтве з рэжысёрам Марынай Мiхальчук на базе кнiгi была створана новая п’еса “Свята кабана”. Гэта яркая сатыра паказвае нязносна смешную, але насамрэч кафкіянскую рэальнасць, у якой так лёгка можна апынуцца.
У лістападзе распачаўся другі этап праекта, мэта якога — ужо пастаноўка трох чытак новых п’ес. У ім удзельнiчалі акторы незалежнай групы, рэжысёры праекта, а таксама беларускiя і нямецкiя мастакi i спецыялiсты.
Прэзентацыяй прэм’ер трох чытак-спектакляў у тэатры Рампэ ў Штутгарце пазначаецца трэці этап.
Пачатак паказу чытак 26 лістапада — 18:00 па нямецкім часе. Спектаклi будуць прадстаўлены на беларускай мове з нямецкiмi субтытрамі. Стрым на YouTube-канале групы “Купалаўцы» пачнецца а 20:00 па беларускім часе.
Акрамя сцэнiчных чытак, у гэты дзень таксама запланавана панэльная дыскусiя памiж беларускiмi i нямецкiмi экспертамi, прысвечаная шырокiм пытанням сучаснасцi i будучынi незалежнага беларускага мастацтва, пытанням актуальнасцi i прасоўвання беларускай культуры на Захадзе і, у прыватнасці, у Германii, варыянтам развiцця мастацтва ў эмiграцыi. Гэтая размова адбудзецца ў тэатры а 16:00 па нямецкім часе (18:00 – па беларускім).
Artykuł У Штутгарце «Купалаўцы» пакажуць прэм’еру трох чытак спектакляў pochodzi z serwisu БЕЛАРУСКАЕ РАДЫЁ РАЦЫЯ.