Супольнасць беларускіх журналістаў у Беластоку падвяла вынікі году

Каля трох дзясяткаў беларускіх журналістаў, сабраліся ў хабе "Новая Зямля", каб разам падвесці вынікі.

Супольнасць беларускіх журналістаў у Беластоку падвяла прафесійныя вынікі адыходзячага 2023 года. Каля трох дзясяткаў беларускіх журналістаў, пераважная частка з каторых апынулася ў Беластоку пасля 2020 года, сабраліся ў хабе “Новая Зямля”, каб разам падвесці вынікі і падыскутаваць на тэму цяперашняга стану і перспектыў беларускай журналістыкі па-за межамі Беларусі.

Гаворыць арганізатарка сустрэчы – сябра праўлення Беларускай асацыяцыі журналістаў Зоя Хруцкая:

– У Беларускай асацыяцыі журналістаў ёсць такая цудоўная функцыя – аб’ядноўваць журналістаў, дапамагаць ім, спрыяць у іх працы, падтрымліваць. Мне падаецца, што вельмі важна і каштоўна, што яны працягваюць гэта рабіць нават у цяперашніх суперскладаных умовах. Асабліва каштоўна тое, што ў кожным месцы, дзе гуртуюцца беларускія журналісты, ёсць магчымасць рабіць сустрэчы, дзе журналісты могуць падзяліцца сваім досведам, падвесці вынікі года, можа быць за штосьці падзякаваць, згадаць нейкія поспехі, падзяліцца імі з іншымі.

Хоць цяпер за кратамі ў Беларусі застаюцца больш трох дзясяткаў, а ў выгнанні з краіны сотні беларускіх журналістаў, намеснік старшыні Беларускай асацыяцыі журналістаў Барыс Гарэцкі лічыць вынікі дзейнасці беластоцкай супольнасці ў адыходзячым годзе – больш станоўчымі:

– Я рады, што мы і наша беластоцкая журналісцкая супольнасць, даволі вялікая, мае магчымасць сабрацца і падвесці вынікі года, рэдакцыі якіх базуюцца ў Беластоку, выданняў, якія тут маюць прадстаўнікоў, маюць істотныя вынікі, цікавыя праекты, дасягненні. Мне падаецца, што ўсе спрацавалі вельмі годна, запусціліся новыя праекты. Год быў хутчэй у плюс, чым у мінус.

Матэрыял слухайце ў далучаным гукавым файле:

Завяршылася сустрэча беларускай супольнасці журналістаў у Беластоку – гульнёй у квіз, які адмыслова прывёз з Варшавы прадстаўнік Прэс-клуба Павел Свярдлоў.

Юрась Дзяшук, Беларускае Радыё Рацыя