Нохчийн омбудсмена доьху Каляпинна дуьхьал бехктакхаман гIуллакх долор
Нохчийчуьрчу адамийн бакъонашкахула волчу векало Солтаев Мансура шен инстаграм-аккаунтехь тIедожочу кепехь дехар дина бехктакхаман гIуллакх схьаделла аьлла "Iазап лелорна дуьхьал Комитетан" куьйгалхочунна Каляпин Игорьна дуьхьал. Цул сов, нохчийн омбудсмена кхайкхам бина Каляпин юкъарваккха аьлла Оьрсийчоьнан президента Iуналла дечу адамийн бакъонашкахула йолчу Кхеташонна(СПЧ).
Шен тIедахкарш Солтаевс хьажийна СПЧ-н гIантдега Фадеев Валерига. Омбудсмена билгалдоккху, нохчийн Iедалшкахь тоьшаллаш ду, Каляпина ахчанца гIо деш хиларан, экстремизмана а, Терроризмана а гIортор ечу нахана, аьлла.
Солтаевс шен видеокхайкхамехь хозуьйту шен телефонера аудио, муьлш бу цаухучу наха нохчийн мотт буьйцуш. Цхьана аудио тIехь дуьйцуш ду Нохчийчоьхь полицин белхахо хиллачунна Туркойчохь еттарх лаьцна. Солтаевс чIагIдарехь, цу тIехь бакъонашларъярхочун Янгубаев Абубакаран дас Янгулбаев Сайдис доьху еттар дIасадаржада. Нохчийчуьрчу Iедалхочунна хетарехь, и зулам вовшахтоьхнарш вежарий ЯнгулбаевгIар бу.
ШолгIачу аудио тIехь омбусменна хетарехь, Янгулбаев Абубакаран ваша Байсангур ву боху, "Iазап лелорна дуьхьал Комитетан" ю аьлла, шайн дас лаьцначу петарах ахча дIалуш ерг.
Дечкен-беттан 20-чохь, шаьш Нохчийчуьрчу чоьхьарчу гIуллакхийн министраллан белхахой ду аьлла, цхьа нах чулилхира Лахарчу Новгородехь бехачу ЯнгулбаевгIеран хIусаме. Курхалла лелорах долчу гIуллакхца доьзна тешаш санна лебан нуьцкъаша суьдхочун болх бина Янгулбаев Сайди а, цуьнан хIусамнана Мусаева Зарема а дIабига бакъо луш, кехаташ дара цаьргахь. Янгулбаев Сайдин суьдхочун статус хиларна, цунах куьйг Iотта йиш яцарна, полисхоша цхьа Мусаева дIайигира. Амма йиттинера оцу петар чохь мел хиллачунна, ЯнгулбаевгIеран доьзална а, адвокатна а, "Iазапашна дуьхьалояран Комитетан" белхахошна а. ДIайигинчу дийнахь дуьйна Мусаева Заремигара хьал хууш дац цуьнан доьзална бакъонан статусехь.
КIирандийнахь ренспубликан инфрмацин а, зорбанан а министро Дудаев Ахмеда хаам бира, Мусаевана 15 де-буьйса админитративан лацаран кхел йина аьлла, полисхочунна тIелетар дарна а, иза сийсаз варна а.
Дечкен-беттан 21-чохь Нохчийчоьнан куьйгалхочо видео дIаязйира, ЯнгулбаевгIеран доьзална кхерамаш туьйсуш. Цо дIахьедира, "оцу доьзале хьоьжуш меттиг бу йа набахтехь, йа лаьтта бухахь". Иштта цо чIагIдо, Соьлжа-ГIала ша схьакхачийначул тIаьхьа Мусаева "полицин белхахочунна тIелеттера, бIарг баккханза ваьлла иза" аьлла.
Кадыровс чIагIдо, ЯнгулбаевгIеран доьзал IАДАТ оппозицин телеграм-канлаца боьзна бу бохуш. Шоьтан дийнахь вистхуьлуш цо бехкебина ЯнгулбаевгIерани доьзал террористийн агIончаш а бу. Туркойчхочхь полисхочун лаьттинчунна тIелатар дарна а гунахь бу аьлла.
Цул сов, Кадыровс кхайкхамбина Оьрсийчуьрчу Лакхарчу кхеле Янгулбаев Сайди суьдхочун статусах ваккха аьлла. Кадыровн дешнаш бакъ цахиларх дIа а хьедеш, Янгулбаев Сайдин а, Мусаева Заремин а воккхаха волчу кIанта Янгулбаев Абубакара кхайкхамбина Оьрсийчоьнан президенте Путин Владимире, "Дождь" телекална интервью лучу заманчохь, Нохчийчоьнан куьйгалхо волчуьра Кадыров Рамзан дIаваккха аьлла.