Меттигера вахархо вийна аьлла нохчо лаьцна Францихь
Лаьцначун цIе йоккхуш йац, хIунда аьлча, ницкъахоша толлуш ду оцу гIуллакхца цуьнан воьзна хилар. Къаьстина, иза Тарбехь вехаш хилар, лаьцна марсхьокху-беттан 23-чохь Iуьйранна.
Вийна стаг товбеца-беттан 26-чохь, Байонн даздечу дийнахь – баскан культурина лерина пхеа денна хIоттийна фестиваль йу иза. ТIелеттачу кхааммо йиттинера 46 шо долчу стагана церан йуьхь йаьккхинчул тIаьхьа. Тешаша дIахьедо, тIехьаьжина 20 шарера 25 шаре бевлла кегийн нах бара уьш, даккхийчу догIмашца бохуш.
Хьен-туьта лазийнера Патрисан, дарбанан цIийнехь кхелхира иза исс дийнахь кхетамчуьра ваьлла Iийначул тIаьхьа. Байоннан ассоциацийн Вовшахтохаралло йемалдира и зулам.
"Сакъоьрийлашка марзбеллачаьрга гIали чохь оьзда лела веза аьлла, урамашна хазалла а, цIеналла а оьшу, цунах самукъа а долу аьлла, царна дагадаийтарна вийна иза. Шен гIуллакх дан урамашкахь леррина хIиттийна писсуараш йу аьлла, цаьрга аларна цунна тIелетта", - аьлла ду биллинчу кхайкхамехь.
Муьлххачу а кепехь гIаличохь гIелойарна дуьхьал митинг хIоттайе аьлла, кхайкхамбина жигархоша – фестиваль йирзинчул тIаьхьа меттигерчу полицига диъ дIахьедар дина хилла, хьийзийна аьлла.
Мангал-бутт бовш ши нохчо лецира герзаш диттина аьлла, шеконаш хилла. Францин къилбера Перпиньянехь стохка марсхьокху-баттахь дина хIума дара и. ХIетахь вийнера 17 шо долу кхиазхо, важа маьждигчохь лечкъинера, амма чолхе чевнаш йинера цунна а.
2021-чу шеран зазадоккху-баттахь Францехь 1500 сов стаг аравелира нохчийн диаспораца нийсо лелор доьхуш. Акци хIоттаран бахьана дара Рен гIалахь зазадоккху-беттан 17-чохь Нохчийчуьра схьаваьлла 23 шо долу Лабазанов Хьамзат вер. "Наркотикаш юхкучийн къестамаш" бу хиламна бухехь, бохура полицино, ткъа вийначун гергарчара бохам буьйзира Лабазанов ша вехачу цIа чохь наркотикаш ца йохкийта хьовзарна дилерша бинчу бекхамца.
2020-чу шеран гезгамашин-баттахь, Парижана 96 километар гена йолчу францхойн Эвре гIалахь дов даьллера Нохчийчоьнан а, Африкин а бахархошна йукъахь, ГIалгIайчуьра Евлоев Ахьмад вийра оцу инцидентехь.
2020-чу шеран аьхка Францерчу Дижонехь масех дийнахь девнаш лаьттира Нохчийчуьра а, Къилбаседа Афикера а бахархошна йукъахь. Бахьана дара мангал-беттан 10-чох 16 шо долчу нохчийн кхиазхочунна дина тIелатар. Дижонера хиламаш бирзича Нохчийчуьра шина вахархочунна бехкаш дехкира, вовшашца барт а бина, чолхе тIаьхье йуьтуш, ницкъабрна. Францихь бехачу Нохчийчуьра бахархоша дуккха а аьрзнаш дира Ниццан мэрна, шаьш меттигерчу наркобизнесца дузуш цо къамел дарна. Оцу бахьаница тIаьхьо полице кхайкхийра мэр.