Նոր նախագծով ցմահ ազատազրկվածներին պատժի 10 տարին կրելուց հետո, մեկ տարվա ընթացքում կտրամադրվի առնվազն 6 կարճատև և 2 երկարատև տեսակցություն
ՀՀ քրեակատարողական օրենսգրքի 92-րդ հոդվածի 2-րդ մասի համաձայն` առանձնապես ծանր հանցագործության համար որոշակի ժամկետով ազատազրկման կամ ցմահ ազատազրկման դատապարտված անձանց տրամադրվում է տարվա ընթացքում առնվազն երեք կարճատև և մեկ երկարատև տեսակցություն: Նշված սահմանափակումը վերանում է, եթե դատապարտյալը փաստացի կրել է պատժի` ՀՀ քրեական օրենսգրքով պատիժը կրելուց պայմանական վաղաժամկետ ազատում կիրառելու համար սահմանված ժամկետը:
Այս մասին Tert.am-ին հայտնել են ՀՀ արդարադատության նախարարությունից, պատասխանելով հարցին, թե ցմահ ազատազրկման դատապարտված անձանց պատժի կրման վերաբերյալ ձեռնարկված ինչ օրենսդրական նախաձեռնություններ ու փոփոխություններ կան:
«Նախկինում ՀՀ կառավարության 2006 թվականի օգոստոսի 3-ի «ՀՀ արդարադատության նախարարության քրեակատարողական ծառայության` կալանավորվածներին պահելու վայրերի և ուղղիչ հիմնարկների ներքին կանոնակարգը հաստատելու մասին» թիվ 1543-Ն որոշման հավելվածի 140-րդ կետի համաձայն` փակ, կիսափակ կամ կիսաբաց ուղղիչ հիմնարկում պատիժը կրող դատապարտյալին կարճատև տեսակցություն կարող էր թույլատրվել միաժամանակ երեքից ոչ ավելի, իսկ երկարատև տեսակցության դեպքում` երկուսից ոչ ավելի չափահասների հետ, որոնց կարող են ուղեկցել դատապարտյալի անչափահաս եղբայրները, քույրերը, զավակները և թոռները»,-հայտնել են ԱՆ-ից:
Նախարարության տրամադրած տվյալների համաձայն՝ ներկայումս ՀՀ կառավարության 2016 թվականի փետրվարի 25-ի թիվ 167-Ն որոշմամբ կատարված փոփոխությամբ` փակ, կիսափակ կամ կիսաբաց ուղղիչ հիմնարկում պատիժը կրող դատապարտյալին կարճատև տեսակցություն կարող է թույլատրվել միաժամանակ առավելագույնը 4 չափահաս և 5 անչափահաս անձանց հետ, իսկ երկարատև տեսակցություն` առավելագույնը 4 չափահաս անձանց և դատապարտյալի 4 անչափահաս եղբայրների, քույրերի, զավակների և թոռների հետ:
Նախարարությունից նաև հայտնել են, որ 2017 թվականի մարտի 1-ին «ՀՀ քրեակատարողական օրենսգրքում փոփոխություններ և լրացումներ կատարելու մասին» ՀՕ-63-Ն ՀՀ օրենքով համապատասխան փոփոխություններ և լրացումներ են կատարվել ՀՀ քրեակատարողական օրենսգրքում, մասնավորապես. ՀՀ քրեակատարողական օրենսգրքի 115-րդ հոդվածի 1-ին մասը սահմանում է, որ պատիժը կատարող հիմնարկի ղեկավարը անկախ հանձնաժողովի եզրակացությունն ստանալու պահից յոթնօրյա ժամկետում այն ներկայացնում է դատարան, եթե դատապարտյալը գրավոր համաձայնություն է տալիս, որը կցվում է եզրակացությանը, իսկ 116-րդ հոդվածի 2-րդ մասի համաձայն` ցմահ ազատազրկման դատապարտված անձի կողմից անկախ հանձնաժողովի եզրակացությունը դատարան ներկայացնելու համաձայնություն չտալու դեպքում պատիժը կատարող հիմնարկի վարչակազմը տվյալ դատապարտյալին պատիժը կրելուց պայմանական վաղաժամկետ ազատելու կամ պատժի չկրած մասն ավելի մեղմ պատժատեսակով փոխարինելու հարցը ներկայացնում է անկախ հանձնաժողովին եզրակացությունը տալուց հետո՝ մեկուկես տարի անց:
«Վերը նշված հոդվածների բովանդակությունից հետևում է, որ անկախ հանձնաժողովի եզրակացության բնույթից` դրական կամ բացասական, դատապարտյալի համաձայնության դեպքում պայմանական վաղաժամկետ ազատման հարցը քննվում է դատարանի կողմից:
Բացի այդ, ՀՀ արդարադատության նախարարության կողմից մշակվել է «Հայաստանի Հանրապետության քրեակատարողական օրենսգրքում փոփոխություններ և լրացումներ կատարելու մասին» ՀՀ օրենքի նախագիծը, որի համաձայն՝ ցմահ ազատազրկման դատապարտված անձանց, նշանակված պատժի տասը տարին կրելուց հետո, մեկ տարվա ընթացքում տրամադրվում է առնվազն վեց կարճատև և երկու երկարատև տեսակցություն»,- հայտնել են ԱՆ-ից: