Չի փոխվել սպանդանոցների հզորությունը, չկան նոր սպանդանոցներ, և եթե անգամ ունենք, ունենք թղթի վաճառք, ոչ թե մորթ. Բաբկեն Պիպոյանը` մսամթերքի թանկացման մասին
ՏՄՊՊՀ-ն հավանաբար շուկայի գները համեմատում է նախորդ ամսվա հետ և ոչ թե նախորդ տարվա հետ, այսինքն՝ մենք ունենում ենք կամ աճի ցածր տոկոսներ կամ նախորդ ամսվա համեմատ, երբ մենք վերցնենք ընդհանուր շուկան, կփաստենք, որ չունենք: Այս մասին ասել է «Իրազեկ և պաշտպանված սպառող» հ/կ-ի նախագահ Բաբկեն Պիպոյանն «Ազատություն» ռադիոկայանի եթերում:
«Երբ նախորդ տարի, եթե չեմ սխալվում, հոկտեմբեր-նոյեմբեր ամիսներին մենք ունեցանք շաքարավազի շուկայում էական թանկացում, այդ ժամանակ մրցակցային մարմինը չարձագանքեց, երբ հարկ կար արձագանքելու: Իսկ հիմա, եթե համեմատի թանկացած գնի հետ, ապա կարձանագրի, որ մենք էական փոփոխություն չենք ունեցել: Դեռ ավելին՝ պիկի հետ համեմատած՝ այս պահին անգամ գնանկում ունենք, որովհետև շաքարավազի գինը դեկտեմբերին բարձրացել էր, որից հետո մի փոքր գնանկում ունեցանք»,-ասել է Բաբկեն Պիպոյանը:
Ըստ նրա՝ մրցակցային մարմինն, ըստ էության, միակ մարմինն է, որ գներին արձագանքում է, որի վրա դրված է կառավարության անգործության ամբողջ բեռը: Իսկ մրցակցային մարմինն առանձին է գործում կառավարությունից: Բոլոր այն ուղղություններում, որտեղ գերիշխող դեր ունեցող չկա, նույն միս-մսամթերքը, չունենք մի տնտեսվարող, որը օրինակ՝ ծավալ է ապահովում, հետևաբար գնի մասով մրցակցային մարմինն անելիք չունի:
«Այստեղ պետք է բիզնեսը զարգանա, տնտեսությունը զարգանա, համապատասխան կառույցները, գյուղոլորտում՝ գյուղնախարարությունը, տնտեսական զարգացման այլ ոլորտներում՝ ժամանակին նորմալ, հեշտ անուն էր՝ Էկոնոմիկայի նախարարությունը, որպեսզի մենք կարողանանք զսպել այս գնաճը և համապատասխան մեխանիզմներ կիրառել: Եթե չկիրառենք՝ փաստելու ենք միայն բացասականը»,-վստահեցրել է «Իրազեկ և պաշտպանված սպառող»-ի նախագահը:
Նրա խոսքով՝ իրեն հարգող որևէ երկրում, եթե անասնակերի պատճառով ստիպված պետք է մորթ արվեր, նախարարությունը չէր թողնի, որովհետև նա կհասկանար, որ դա նշանակում է, որ մյուս տարի դեֆիցիտ է լինելու, որը բերելու է էական գնաճի:
«Գյուղատնտեսության նախարարը, ցավոք, իր մեկնաբանություններում միշտ հիշեցնում է իր հաշվապահ լինելը, բայց մոռանում է հավանաբար, որ ինքը գյուղատնտեսության նախարարն է: Եթե մի փոքր իր աշխատանքին տիրապետեր՝ կհասկանար և կիմանար, որ գյուղատնտեսությունն այն բացառիկ ոլորտներից է, որտեղ գնագոյացման վրա նախարարությունը պետք է ունենա ազդեցություն: Եվ ուղղակի վերցնել շուկայով պայմանավորել ու ասել՝ դե շուկան թելադրել է իր գինը, ուղղակի անթույլատրելի է: Նույնն է, թե մրցակցային մարմինն ասի՝ գերիշխող մարմինը որոշել է ապրանքն այս գնով վաճառել, լավ է անում, վաճառում է»,-ասել է Բաբկեն Պիպոյանը:
Ըստ նրա՝ գնաճի տեմպերով ամենավատ վիճակում տավարաբուծությունն է: Տավարի միսը, որ ամենաքիչն է թանկացել, ամենամտահոգիչն է: Գյուղացին կենդանուն չկարողանալով պահել՝ ստիպված մորթ է իրականացնում, շուկայում ունենում ենք հագեցվածություն, հագեցվածությունն իր հետ բերում է այն, որ մեծ կուրսով գնաճ չենք կարողանում ապահովել: Դրան հակառակ՝ այս տեմպով շարունակելու դեպքում ունենալու ենք դեֆիցիտ, այդ ժամանակ շուկայում պահանջարկ չի լինելու, մորթ չի իրականացվելու, համապատասխանաբար ավելի մեծ գնաճ կարձանագրվի:
Անդրադառնալով սպանդանոցներին՝ «Իրազեկ և պաշտպանված սպառող» հ/կ-ի նախագահն ասել է. «Մեր երկրում, ինչպես շատ այլ ոլորտներում, ձևի և բովանդակության մեջ ունենք ավելի շատ ձևին միտված հայտարարությունների շարք, որտեղ մենք տեսնում ենք, որ մի կողմից թմբկահարվում է և մեծ գումարներ է ծախսվում գովազդային վահանակների վրա, հոլովակների վրա, առ այն, որ արդեն մենք սպանդանոցներում ենք մորթ անում, մյուս կողմից մենք տեսնում ենք, որ չի փոխվել սպանդանոցների հզորությունը, այսինքն՝ չեն կառուցվել նոր սպանդանոցներ, և եթե անգամ ունենք, ունենք թղթի վաճառք, ոչ թե մորթ, որ կարող էր էականորեն ազդել ինքնարժեքի վրա»: