Վանուատուն դարձել է առաջին երկիրը, որի քաղաքացիությունը կարելի է գնել բիթքոիններով
Մելանեզիայում գտնվող Վանուատու Հանրապետությունը դարձել է առաջին երկիրն աշխարհում, որի քաղաքացիությունը կարելի է ձեռք բերել բիթքոիններով: Այս մասին հայտնում է ТАСС-ը՝ հղում անելով Ազգային տեղեկատվական կենտրոնի (Vanuatu Information Center - VIC) ղեկավար Ջեֆրի Բոնդին:
«Անցյալում այլ երկրներում արդեն փորձեր ձեռնարկվել են քաղաքացիության համար վճարման գործընթացը բիթքոիններով կազմակերպելու ուղղությամբ, սակայն քաղաքական գործիչները երբեք չեն հաստատել այդ փորձերը, և արդյունքում դրանք անհաջող են եղել: Տվյալ դեպքում Վանուատուի կառավարությունը միանշանակ հայտնել է նոր տեխնոլոգիաների ոլորտում առաջատար լինելու ցանկության մասին և հաստատել մեր կենտրոնի՝ քաղաքացիությունը գրանցելու ընթացքում բիթքոիններ ընդունելը», - ասել է Բոնդը:
Նշվում է, որ արտասահմանցիների համար Վանուատուի քաղաքացիություն ստանալու գործընթացն արժե 200 հազար դոլար կամ մոտ 42 բիթքոին՝ ընթացիկ փոխարժեքով:
Աղբյուրի հաղորդմամբ՝ Վանուատուի քաղաքացիությունը կարող է գրավիչ լինել առաջին հերթին գործարարների համար, քանի որ այս երկիրն արտոնյալ հարկային համակարգ ունի: Դրանից բացի, Վանուատուի քաղաքացիները կարող են առանց վիզայի այցելել 113 երկիր: