Օրենքն ոչ թե խարխլելու է հայ ավանդական ընտանիքի մոդելը, այլ ճիշտ հակառակը. Արմենուհի Հովհաննիսյան (տեսանյութ)
Եկել է ժամանակը, որ մեր երկրում այսպիսի օրենք ընդունվի, որովհետև մենք ականատես ենք լինում և համացանցում էլ կարդում ենք, թե ինչպիսի բռնություններ են տեղի ունենում՝ մանավանդ ընտանեկան, ինչը շատ մտահոգիչ է այսպիսի փոքրիկ երկրի համար. Tert.am-ի հետ զրույցում այս մասին ասաց «Օրրան» բարեգործական ՀԿ տնօրեն Արմենուհի Հովհաննիսյանը՝ խոսելով արդարադատության նախարարության ներկայացրած «Ընտանեկան բռնության կանխարգելման և ընտանեկան բռնության ենթարկված անձանց իրավունքների պաշտպանության մասին» օրենքի նախագծի մասին:
Արմենուհի Հովհաննիսյանի կարծիքով՝ այս օրենքը ոչ թե խարխլելու է հայ ավանդական ընտանիքի մոդելը, այլ ճիշտ հակառակը՝ այն ավելի է ամրապնդելու: Վերջինս վստահ է, որ մեր երկրի համար նման օրենք պետք է:
«Բոլոր երկրներում էլ կա և երկար տարիներ գործում է այսպիսի օրենք: Ճիշտ է՝ կան որոշ երկրներ, որտեղ որոշ դեպքերում այն ծայրահեղության է հասնում, օրինակ` ԱՄՆ-ում, սակայն դա չի նշանակում, որ այդ օրենքը չպետք է լինի, այսինքն, եթե կա ծնող, որը իր երեխայի համար ֆիզիկապես վտանգ է ներկայացնում, ապա պետք է օգնել այդ ծնողին և ընտանիքի մյուս անդամներին՝ նրանց հոգեբանի մոտ կամ առողջապահական այլ հաստատություններ տանելով»,-ասաց նա։
Նրա խոսքերով՝ օրենքը կնպաստի, որպեսզի ընտանիքներում որոշումներն ավելի խաղաղությամբ ընդունվեն, ինչպես նաև կնվազի ֆիզիկական բռնությունների քանակը, քանզի բռնարարի մոտ այլևս իր արարքի համար պատժի ենթարկվելու մտահոգություններ կառաջանան:
«Մեզ մոտ, օրինակ, երեխաներ են գալիս, ցավոք սրտի, սոցիալապես շատ աղքատ ընտանիքներից, որտեղ ծնողներն ունեն շատ լուրջ խնդիրներ, ոմանց հայրերը կարող են ալկոհոլիկներ լինեն կամ բերդում նստած լինեն: Կան դեպքեր, որ երեխաներն ոչ միայն ֆիզիկական բռնության են ենթարկվել, այլ նաև սեռական, ինչը, բնականաբար, խիստ բացասաբար է անդրադարձել նրանց հոգեբանության վրա: Այդ իսկ պատճառով մեր կենտրոնում ունենք նաև հոգեբան, որն աշխատում է այդ երեխաների հետ և փորձում է օգնել նրանց՝ այդ խնդիրները հաղթահարելու համար:
Տարիներ առաջ դուք երբեք հեռուստացույցով չէիք տեսնի ինչ-որ հաղորդում կամ ծրագիր, որտեղ ընտանիքներ էին գալիս և իրենց ընտանեկան խնդիրները հանրության քննարկման առարկա էին դարձնում, բայց հիմա մարդիկ շատ հանգիստ գալիս են և իրենց անգամ ամենաինտիմ ընտանեկան հարցերը ներկայացնում են հանրության առջև: Ուրեմն, այո՛, ժամանակներն են փոխվել, արժեքներն են փոխվել և կարծում եմ, որ աշխարհը շատ ավելի բաց ու թափանցիկ է դարձել»,-նկատեց բանախոսը:
Նրա գնահատմամբ՝ օրենքի նախագիծն, ընդհանուր առմամբ վատը չէ, այլ հարց է, որ որոշ դրույթների փոփոխության անհրաժեշտություն կա և այդ առումով կառուցողական քննարկումներ պետք է իրականացվեն: Այսուհանդերձ, Արմենուհի Հովհաննիսյանը մտահոգություններ ունի օրենքի կիրառման հարցում: Այս համատեքստում նա կարևորում է իրավապահների և համապատասխան այլ աշխատողների պատրաստվածությունը նման իրավիճակներում: