Չեմ ցանկանում, որ ընտրապայքարը թեժանա, թեժ եղել են այն տարիները, որոնք աշխատել ենք. Ռինդի գործող գյուղապետ
Վայոց ձորի մարզի Արենի համայնքում նոյեմբերի 5-ին սպասվող տեղական ինքնակառավարման մարմինների ընտրություններին առաջադրված՝ Հայաստանի Հանրապետական կուսակցության թեկնածու, Ռինդի գործող գյուղապետ Հուսիկ Սահակյանը, Tert.am-ի հետ զրույցում պատասխանելով հարցին, թե իր շանսերը գնահատելով՝ ընտրություններին կանցնի՞, թե ոչ, ասաց, որ անպայման հաղթելու է, երկրորդ կարծիք չկա։
Ինչ վերաբերում է մրցակցությանը մյուս երկու թեկնածուների հետ, որոնք ինքնաառաջադրվել են, Հուսիկ Սահակյանը նշեց, որ մրցակցությունը շատ առողջ և հանգիստ է ընթանում:
«Ես հարգանքով եմ մոտենում բոլոր թեկնածուներին, ոչ մի քննադատական բան որևէ մեկի հասցեին չեմ ասի: Եթե առաջադրվել են, ուրեմն արժանի են: Ես կցանկանայի, որ բոլորն էլ իմ պես վերաբերվեին, որն էլ առողջ պայքար կառաջացնի»,-ասաց նա և նշեց, որ համայնքում և՛ ընդդիմադիր, և՛ իշխանական զանգվածն է մեծ:
Հուսիկ Սահակյանը նշեց, որ չի ցանկանում ինքնագովազդով զբաղվել, սակայն իրեն համարում է այն գյուղապետերից, ովքեր անմնացորդ նվիրվել են իրենց գյուղի բարգավաճմանը, զարգացմանը:
«Եթե դուք այսօր մտնեք մեր գյուղ, կտեսնեք, թե ինչի համար է, որ հենց ինձ են ընտրել: Իմ կատարած աշխատանքի, անցած ճանապարհի համար»,-ասաց նա և նշեց, որ 20 տարի է՝ ժողովուրդը իրեն ճանաչում է և չպետք է նոր ճանաչի:
Գյուղապետն ասաց, որ չի ցանկանում, որ պայքարը թեժանա. «Թեժ եղել են այն տարիները, որոնք աշխատել ենք, որ զրոյից արել, դրել ենք»։
Ինչ վերաբերում է սերնդափոխության անհրաժեշտությանը, Հուսիկ Սահակյանն ասաց. «Եթե կան պատրաստած երիտասարդներ, պետք է մեզ հետ քայլեն: Մենք այսօր 9 գյուղի համայնքի ղեկավար ենք ընտրում, բա չհասկանա՞նք, թե ում ենք տալիս: Ընտրողները արդեն գիտեն, թե ում ընտրեն, մարդիկ շատ լավ էլ հասկանում են, ում էլ ընտրեն»։
Խոսելով համայնքների խնդիրներից՝ նա նշեց, որ այն համայնքներում, որոնց բյուջեն շատ է, դոտացիաները շատ են, իրենք մինչ օրս չեն կարողացել որոշակի խնդիրներ կարգավորել:
Մասնավորապես Արենիում նա մատնանշեց, որ կա մանկապարտեզի, հին կամուրջի, խմելու ջրի արտաքին ցանցի վերանորոգելու, դպրոցի կառուցման խնդիրներ:
Հիշեցնենք, որ Վայոց ձորի մարզի Արենի համայնքում ԲՀԿ-ի թեկնածուն կլինի Արփիի ԲՀԿ-ական գյուղապետ Ռազմիկ Վարդանյանը, ինքնաառաջադրվել է նաև Արենիի գործող գյուղապետ, անկուսակցական Րաֆֆի Խաչատրյանը: