Չեմ կարծում, որ տարկետման հնարավորության վերացումը կխթանի արտագաղթը. նախարար
Պաշտպանության և անվտանգության հարցերի մշտական հանձնաժողովը դրական եզրակացություն տվեց «Զինվորական ծառայության և զինծառայողի կարգավիճակի մասին» օրենքի նախագծին, որը մտավ ԱԺ լիագումար նիստի օրակարգ:
Մինչ այդ պատգամավորներին կրկին հետաքրքրում էր տարկետում չթույլատրելու խնդիրը, ըստ նրանց՝ դա կարող է արտագաղթի պատճառ դառնալ:
Նախարարը համամիտ չէր. «Բացարձակ ոչ, որովհետև տարկետումից օգտվում է հասարակության շատ փոքր հատված, մնացածը պարտադիր ծառայության ժամկետի տակ են: Հետևաբար՝ չեմ կարծում, որ օրենսդրության նման վերանայումը մեծ խթան էր դառնալու լրացուցիչ ինչ-որ արտագաղթային հոսքերի»,-ասաց նախարարը:
Վիգեն Սարգսյանի խոսքով, առհասարակ, արտագաղթի դեմն առնելը շատ ավելի երկարատև, հետևողական քաղաքականության արդյունք պետք է լինի, որը չի կարող հենվել զինծառայությունից խուսափելու լրացուցիչ հնարավորություններ ձևավորելու հոգեբանության վրա:
Նախարարը նկատեց, թե առաջին տարկետումը գրեթե ազատման այցեքարտ է:
«Հետևաբար՝ չեմ կարծում, որ մեր քաղաքականությունը կարող է հենվել նրա վրա, որ եկեք մի քիչ տարկետման տեղ թողնենք, որ արտագաղթը նվազի, դա հարցը չի լուծելու»,-ասաց նա: