Թրամփի և Պուտինի հանդիպումը Վիետնամում անցկացվելիք ԱԽՏԽ գագաթնաժողովի ժամանակ չի բացառվում. Սպիտակ տան աշխատակից
ԱՄՆ նախագահ Դոնալդ Թրամփի և Ռուսաստանի նախագահ Վլադիմիր Պուտինի հանդիպումը նոյեմբերին Վիետնամում կայանալիք Ասիական և խաղաղօվկիանոսյան տնտեսական խորհրդի գագաթնաժողովի շրջանակում չի բացառվում: Այս մասին լրագրողների համար անցկացվող հատուկ բրիֆինգի ժամանակ հայտնել է Սպիտակ տան ապարատի աշխատակիցը:
«Մենք կարող ենք երկկողմանի հանդիպումներ հաստատել առաջնորդների հետ, որոնք նոյեմբերին գագաթնաժողովներ են անցկացնում Ասիայում: Դեռ պատրաստ չենք հայտարարել այլ երկկողմանի և բազմակողմանի հանդիպումների մանրամասների մասին, որոնցում կմասնակցի Թրամփը», - ասել է ամերիկացի պաշտոնյան՝ պատասխանելով այն հարցին, արդյոք ներկա պահին Թրամփի և Պուտինի՝ Դանանգ քաղաքում կայանալիք Ասիական և խաղաղօվկիանոսյան տնտեսական խորհրդի գագաթնաժողովի շրջանակում հանդիպման պլաններ կան:
Այն հարցին, արդյոք Թրամփը պատրաստ է մասնակցել լրացուցիչ երկկողմանի հանդիպումներին, պաշտոնյան ասել է, որ սա պոտենցիալ կերպով հնարավոր է:
«Սակայն ոչ մի բան չկա, ինչ մենք պատրաստ ենք հստակ կերպով ասել կամ հայտարարել», - ասել է բրիֆինգի վարողը:
Պլանավորվում է, որ նոյեմբերի 3-14-ը Թրամփն ասիական շրջագայություն կիրականացնի, որի ընթացքում կայցելի Ճապոնիա, Հարավային Կորեա, Չինաստան, Վիետնամ և Ֆիլիպիններ: