Փայլանը քննադատել է Թուրքիայի խորհրդարանի նախագահին ու ծաղրել իշխանամետների բեղերը
Թուրքիայի ընդդիմադիր Ժողովրդադեմոկրատական կուսակցության անդամ, խորհրդարանի հայազգի պատգամավոր Կարո Փայլանը հերթական նիստի ժամանակ կոշտ քննադատության է ենթարկել խորհրդարանի նախագահ Իսմայիլ Քահրամանին՝ մեղադրելով նրան իշխանամետ պահվածքի ու ոչ օբյեկտիվ լիենլու համար: Այս մասին գրում է թուրքական gazeteduvar.com.tr կայքը:
«Դուք իշխանական կուսակցության ներկայացուցիչ չեք, դուք այս Մեջլիսում առկա բոլոր կուսակցությունների ու օրենսդիր մարմինների նախագահն եք: Մեջլիսում 3 հազարից ավելի անպատասխան մնացած հարցում կա: Երկու տարվա ընթացքում այստեղ եղած պատգամավորներին պաշտպանելու համար ոչինչ չարեցիք, դուք իմ կյանքում տեսած ամենահակաժողովրդական խորհրդարանի ղեկավարն եք, հուսամ՝ նոր խորհրդարանական շրջանում չեք ընտրվի», - ասել է Փայլանը:
Հայազգի պատգամավորը ներկաների ուշադրությունն է հրավիրել իշխանամետ թևի ու այդ թվում խորհրդարանի նախագահի՝ վերջին երկու տարում առավել մեծ տարածում գտած բեղերի ձևի վրա:
«Երկիրը սկսել է դառնալ միանման բեղերի պետություն: Եկեք երկու տարի առաջվա նկարը դնենք մեր առաջ, Մեջլիսում բեղավորները հազիվ 10 տոկոս կազմեին, հիմա նրանք հասել են 90 տոկոսի, քաղաքականության մեջ մնալու հույս ունեցողները կարծես իրենց հարկադրված են զգում բեղ պահել», - ասել է Փայլանը:
Ամիսներ առաջ Associated Press գործակալությունը հետաքրքրական հոդված էր հրապարակել այն մասին, որ Թուրքիայի իշխող «Արդարություն և զարգացում» կուսակցության շրջանում շատ նորաձև է դարձել բեղերի այն ձևը, որն ունի նախագահ Ռեջեփ Թայիփ Էրդողանը:
Նախարարներից մեկը նույնիսկ խոստովանել էր Associated Press-ին, որ որոշ նախարարներ բեղեր են պահում Էրդողանի խորհրդով։