Պատրաստ ենք ազնիվ ընտրապայքարում ներկայացնել մեր տեսլականները. Շարմազանովը` ՏԻՄ ընտրությունների մասին
Իշխող Հանրապետական կուսակցության Գործադիր մարմնի նիստում քննարկվել են ներքաղաքական հարցեր` այդ թվում նոյեմբերի 5–ին սպասվող ՏԻՄ ընտրությունների վերաբերյալ։
Այդ մասին նիստից հետո լրագրողների հետ զրույցում ասեց ՀՀԿ խոսնակ, ԱԺ փոխնախագահ Էդուարդ Շարմազանովը։
Նա նշեց` ՀՀԿ–ն ակտիվ ներգրավված է ընտրական այդ գործընթացում և տեղեկացրեց, որ նիստի ընթացքում քննարկել են նաև քարոզչական խնդիրները, դրական գնահատել ՀՀԿ թեկնածուների շանսերը։
Շարմազանովը նշեց, որ ՀՀԿ–ն լուրջ հնարավորություններ ունի ՏԻՄ–երում ավելի մեծ դերակատարում ունենալու համար` հատկապես, որ առաջին անգամ խոշորացված համայնքներում են տեղի ունենալու ընտրությունները։
«Դրանք մրցակցային են լինելու, բայց, բացի ՀՅԴ–ից, ԲՀԿ–ից այլ կուսակցություններից հայտեր չկան և ավելի լավ կլիներ, եթե ավելի բազմակուսակցական լիներ, սակայն ունենք այն ինչ ունենք, պատրաստ ենք ազնիվ ընտրապայքարում ներկայացնել մեր տեսլականները յուրաքանչյուր համայնքի համար»,–ասաց Էդուարդ Շարմազանովը։