«Հարավկովկասյան երկաթուղի»-ն պահանջվող տեղեկատվություն ներկայացնում է, նախարարի կողմից ստուգումների հանձնարարական չի եղել. ՏԿՏՏ
ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանի կողմից «Հարավկովկասյան երկաթուղի» ՓԲԸ-ում ստուգումներ իրականացնելու հանձնարարական չի եղել:
Այս մասին Tert.am-ի գրավոր հարցմանն ի պատասխան հայտնել են ՀՀ տրանսպորտի, կապի և տեղեկատվական տեխնոլոգիաների նախարարության հանրային կապերի բաժնից:
««Հարավկովկասյան երկաթուղի» ՓԲԸ-ն կոնցեսիոն պայմանագրի և ՀՀ օրենսդրությամբ սահմանված կարգերին համապատասխան՝ ներկայացնում է ամսական, եռամսյակային, տարեկան հաշվետվություններ և ըստ անհրաժեշտության պահանջվող տեղեկատվություն, համաձայն որի՝ ընկերությունը հիմնականում ապահովում է կոնցեսիոն պայմանագրով նախատեսված պարտավորությունները»,-հայտնել են նախարարությունից:
Ի պատասխան հարցին, թե որ դեպքում է ՀՀ կառավարությունը գումար հատկացնում «Հարավկովկասյան երկաթուղի» ՓԲԸ-ին և որքան գումար է ՀՀ կառավարությունը մինչ այժմ հատկացրել ՓԲԸ-ին, նախարարությունից հղում են արել «ՀՀ պետական բյուջեի կատարման մասին» տարեկան հաշվետվությանը:
«Կոնսեցիոն պայմանագրի 2-3հոդվածի 2-րդ կետի համաձայն՝ Կոնցեդենտը սուբսիդավորում է (մասնակի փոխհատուցում է) ուղևորափոխադրումների կոնցեսիոների տարեկան վնասը անկախ աուդիտորի կողմից այդ վնասների հաստատված հաշվարկների ներկայացման պարագայում:
Յուրաքանչյուր տարի անկախ աուդիտորի կողմից ուղևորափոխադրումներից կոնցեսիոների կրած տարեկան վնասների հաշվարկների հաստատմամբ «Հարավկովկասյան երկաթուղի» ՓԲԸ-ն տեղեկատվություն է ներկայացնում լիազոր մարմնին: Սուբսիդիայի չափը հրապարակված է Ազգային ժողովի կողմից յուրաքանչյուր տարի հաստատվող «ՀՀ պետական բյուջեի կատարման մասին» տարեկան հաշվետվության մեջ»:
Նշենք, որ ուղևորափոխադրումներից ստացված վնասի դիմաց 2010 թվականից սկսած յուրաքանչյուր տարի «Հարավկովկասյան երկաթուղի» ՓԲԸ-ին փոխհատուցում է տրվում:
2014թ-ին փոխհատուցման չափը կազմել է 536.5 մլն դրամ, 2015-ին՝ 588.4 մլն դրամ: