Մեկ օրում ավելի քան 50 սիրիացի է վերադարձել հայրենիք
Մեկ օրում 55 սիրիացի է վերադարձել իրենց տուն, որը լքել էին երկրում ռազմական գործողությունների մեկնարկից ի վեր: Այս մասին հայտնում է РИА Новости-ն՝ մեջբերելով Սիրիայում հակամարտող կողմերի հաշտեցման ռուսական կենտրոնի հաղորդագրությունը:
Ինչպես ասվում է կենտրոնի հաղորդագրության մեջ, հայրենադարձներից 29-ը վերադարձել են Հալեպ, 17-ը՝ Հոմս, 9-ը՝ Դամասկոս:
Հաղորդվում է, որ Սիրիայի կառավարությունը և նահանգների տեղական ինքնակառավարման մարմինները շարունակում են անհրաժեշտ օգնություն ցուցաբերել իրենց տները վերադարձած բնակիչներին:
Հաշտեցման ռուսական կենտրոնի աշխատանքի արդյունքում Հոմս նահանգում ևս մեկ բնակավայր է միացել մարտական գործողությունների դադարեցման ռեժիմին: