Forbes-ը հրապարակել է ամենից բարձր վարձատրվող երիտասարդ հայտնիների ցանկը
Ամերիկյան Forbes հանդեսը հրապարակել է ամենից շատ վարձատրվող մինչև 30 տարեկան հայտնիների վարկանշային աղյուսակը:
Ինչպես տեղեկացնում է Lenta.ru-ն, աղյուսակը գլխավորել է եթովպիական ծագում ունեցող կանադացի երգիչ The Weeknd-ը (իրական անունը՝ Աբել Թեսֆայե), որը մեկ տարում 92 մլն դոլար է վաստակել:
Նշվում է, որ երաժիշտն ավելի քան 1.1 մլն է ստացել յուրաքանչյուր ելույթի համար Starboy: Legend of the Fall համերգային շրջագայության ընթացքում: «Արտիստներ արդեն միայն երաժշտությամբ չեն վաստակում, ինչպես ոսկե դարում»,- ասել է 27-ամյա կատարողը:
Երկրորդ տեղում հայտնվել է 23-ամյա կանադացի փոփ-կատարող Ջասթին Բիբերը, որը 83.5 մլն դոլար է վաստակել՝ մեկ տարում մասնակցելով 105 համերգի: Նրան հաջորդում է 29-ամյա բրիտանուհի Ադելը:
Առաջատար տասնյակում ընդգրկվել են նաև բասկետբոլիստ Քևին Դյուրանը, ամերիկյան ֆուտբոլի խաղացող Էնդրյու Լաքը, գոլֆի վարպետ Ռորի Մաքիլրոյը, բասկետբոլիստներ Ստեֆեն Քարին և Ջեյմս Հարդենը, երգչուհի Թեյլոր Սվիֆթը և մոդել Քայլի Ջենները: