Աշխարհին 90 մլն համակարգչային վիրուս է սպառնում մեկ տարում. Կասպերսկի
2017 թվականին ավելի քան 90 մլն վիրուսային ծրագիր կհայտնվի աշխարհում: Lenta.ru-ի հաղորդմամբ՝ նման տվյալներ է ներկայացրել «Կասպերսկու լաբորատորիայի» հիմնադիր և ղեկավար Եվգենի Կասպերսկին:
Նրա խոսքով՝ իրավիճակը կիբեռտարածության ասպարեզում շատ արագ է փոխվում, իսկ ցանցային անվտանգության ապահովումը մասշտաբային խնդիր է: Կասպերսկին հայտնել է, որ 20 տարի առաջ իր ընկերությունը ընդամենը 500 վնասակար ծրագիր է ֆիքսել: Տասը տարի անց՝ 2007-ին, այդ ցուցանիշն արդեն կազմել է 2 մլն համակարգչային վիրուսի օրինակ, որոնք նախադեպը չեն ունեցել նախկինում:
«2017-ին ակնկալում ենք ավելի քան 90 մլն նոր նմուշ հաշվարկել, և դա ընդամենը մեկ տարում», - շեշտել է մասնագետը:
Ընկերության ղեկավարը նշել է, որ օրական շուրջ 300 000 նոր վիրուս է հաշվարկվում, որոնց մեծ մասը կարելի է դասել ոչ բարդ վիրուսների շարքը, որոնք հեշտ է ոչնչացնել: