2018-ին դրույքաչափերը չեն բարձրանալու, բայց մարդիկ ավելի շատ աշխատավարձ են ստանալու. Սերժ Սարգսյան
Լավ ապրելու միակ բանաձևն աշխատելն է, իսկ բարեկեցության միակ ճանապարհը տնտեսական աճն է, «Արմենիա» հեռուստաընկերության «Բանաձև» հաղորդման ժամանակ այս մասին ասել է ՀՀ Նախագահ Սերժ Սարգսյանը՝ պատասխանելով հարցին, թե ի՞նչ է պլանավորում անել Կառավարությունը սոցիալական լարվածությունը մեղմելու համար հաշվի առնելով, որ 2018թ. կենսաթոշակն ու աշխատավարձը չեն բարձրանում, իսկ պարենային ապրանքների գները բարձրանում են:
«Լավ ապրելու միակ բանաձևն աշխատելն է, բարեկեցության միակ ճանապարհը տնտեսական աճն է, և, կարծում եմ, այս առումով մեր կառավարությունը մեծ ջանքեր է կատարում: Մենք ամեն ինչ պետք է անենք, որ մեր տնտեսական աճը լինի շոշափելի: Հիմա կասեք` ինչո՞ւ կոնկրետ թիվ չեք հնչեցնում, այո, հիմա չեմ նշում՝ հաշվի առնելով կոնկրետ հանգամանքներ, բայց շոշափելի պետք է լինի: Մենք ավելի շատ ապրանքներ պետք է արտադրենք, ավելի շատ աշխատատեղեր ստեղծենք, բայց ամենակարևոր խնդիրներից է բարձր վճարվող աշխատատեղերի հարցը:
Երբ ասում ենք` 2018-ին աշխատավարձ չի բարձրանալու, դա այդպես չէ, դրույքաչափերը չեն բարձրանալու, բայց մարդիկ ավելի շատ աշխատավարձ են ստանալու և այնպես, ինչպես նշեցի՝ 2017-ի համար էլ նախատեսված չէր աշխատավարձերի աճ, բայց այս տարվա հոկտեմբերի հանրապետության միջին աշխատավարձը 4,8 տոկոսով ավելի է, քան 2016-ի հոկտեմբերինը: Նույնը լինելու 2018-ին, այսինքն՝ ոնց ուզենք-չուզենք, հընթացս աճ լինելու է։ Դա շատ մեծ չի լինելու, ուղղակի մենք պետք է ձգտենք նրան, որ աշխատավարձերի աճը լինի առաջանցիկ, քան գնաճը, սա է կարևորը, հիմա մենք այդ շրջանակներում ենք»,- ասել է Նախագահ Սերժ Սարգսյանը: