Նազարբաևի՝ ԱՄՆ այցի շրջանակում 7 մլրդ դոլարի պայմանագրեր են կնքվել
Ղազախստանի նախագահ Նուրսուլթան Նազարբաևի՝ Միացյալ Նահանգներ կատարած այցի շրջանակում ստորագրվել է 20-ից ավելի համաձայնագիր, որոնց ընդհանուր արժեքը 7 մլրդ դոլար է։ Այս մասին հայտնում է Ղազախստանի նախագահի մամուլի ծառայությունը, փոխանցում է «ՌԻԱ Նովոստի» գործակալությունը։
Հայտնի է, որ նոր պայմանագրերը կնքվել են The Boeing Company, GE Transportation, GE Digital, Chevron, Air Astana, KazTemirZholy, SCAT Airlines ընկերությունների հետ:
Ավելի վաղ Նազարբաևն ասել էր, որ Վաշինգտոնում ԱՄՆ-ի ու Ղազախստանի միջև ավելի քան 7.5 մլրդ դոլարի 20-ից ավելի առևտրային պայմանագիր կստորագրվի:
«Երկրի ղեկավարի պաշտոնական այցի շրջանակում ստորագրվել է ավելի քան 20 առևտրային փաստաթուղթ՝ ներդրումային ու առևտրատնտեսական համագործակցության վերաբերյալ, որոնք ուղղված են ավիացիայի և տիեզերական հետազոտությունների, նավթաքիմիական ու գյուղատնտեսական ոլորտներում, ինչպես նաև ենթակառուցվածքային զարգացման նախագծերի իրականացմանը»,-ասվում է պաշտոնական հայտարարությունում:
Gazeta.ru-ն հավելում է, որ Նազարբաևն ԱՄՆ-ում կմնա մինչև հունվարի 18-ը: Հայտնի է նաև, որ նա նախագահ Թրամփին հրավիրել է Ղազախստան: