ԱՄՆ-ն Ռուսաստանի նկատմամբ պատժամիջոցները կուժեղացնի, որպեսզի մեկուսացնի ՌԴ-ին, ինչը ՀՀ-ի վրա կարող է վատ ազդել. Գ. Մակարյան
Տնտեսագետ, Հայաստանի գործատուների միության նախագահ Գագիկ Մակարյանի կարծիքով է` ԱՄՆ-ն Ռուսաստանի նկատմամբ պատժամիջոցները կուժեղացնեն, որպեսզի որքան հնարավոր է մեկուսացնեն Ռուսաստանին: Tert.am-ը հետ զրույցում նա նշեց, որ ԱՄՆ-ն հայտարարել է, որ երեք երկրների` Հյուսիսային Կորեայի, Իրանի, Ռուսաստանի հանդեպ պատժամիջոցները շարունակվելու են այնքան, մինչև իրենց կեցվածքը և հարաբերությունները այս պետությունները փոխեն և ոչ թե նպատակ ունի խեղճացնելու կամ պատժելու այնպես, որ այդ երկրում իրավիճակն էլ վատանա:
«Պատժամիջոցները Ռուսաստանի առումով երկրորդ կիրառությունը կունենան, իրենք կփորձեն Ռուսաստանում նախագահի ընտրություններից առաջ պատժամիջոցները ուժեղացնելով ՌԴ-ում ֆինանսական ազդեցություն ունեցողներին մեկուսացնել, խեղճացնել, կամ նրանց մոտ դժգոհության տրամադրություն առաջացնել, որ փորձեն ազդել Պուտինի ընտրությունների պրոցեսների վրա, որովհետև Պուտինի վերընտրվելն ԱՄՆ-ի և Եվրոպայի համար նպատակահարմար չէ»,-ասաց նա:
Գագիկ Մակարյանը նշեց, որ ԱՄՆ-ն Ռուսաստանի նկատմամբ պատժամիջոցները կիրառում է երկու ոլորտում` ֆինանսներ և ռազմական արդյունաբերություն: Ինչ վերաբերում է պատժամիջոցների այդ ալիքի հնարավոր ազդեցությանը Հայաստանի վրա, ապա նա ասաց.«Հայաստանի վրա դա բնականաբար կարող է վատ ազդել, քանի մեր արտահանումը կնվազի և մեր ձեռնարկությունները կսկսեն տուժել»:
Նա օրինակ բերեց, որ վերջին շրջանում Հայաստանում կոնյակի ծավալները 41 տոկոս աճել է, բայց դրա մեծ մասը Հայաստանում չի սպառվում, քանի որ Հայաստանի բնակչությունը խմելն այդքան չի ավելացրել և ոչ էլ զբոսաշրջիկներն են այդքան խմել, իսկ գինու ծավալները 34 տոկոս աճել է, և հատկապես այդ ծավալները դեպի Ռուսաստան են արտահանվում: «Հետևաբար այս սանկցիաները, անպայման, այս ոլորտների վրա կազդեն` գինու, կոնյակի արտադրության, իսկ դրանք էլ մթերումների վրա կազդեն: Պետք է զգույշ լինենք, որ դժվարությունների նոր փուլ կարող է սկսվել»,-ասաց նա:
Ըստ տնտեսագետի` 2018 թվականին Ռուսաստանի տնտեսական աճը հնարավոր է այն տեմպով չզարգանա, ինչպես նրանք նախատեսել են, քանի որ կարող է դրան խանգարել նաև պատժամիջոցները, սակայն եթե 2017 թվականի տեմպը պահպանվի, նորից դրական կլինի:
«Եթե Ռուսաստանի վիճակը վատանա, դա կազդի Հայաստան ուղարկվող տրանսֆերտների վրա: Հայաստանի տնտեսական ակտիվության ցուցանիշը կարող է դրա պատճառով նվազել»,-ասաց նա:
Գագիկ Մակարյանը նշեց, որ Հայաստանում, մոտավորապես առևտրի մեջ ծախսվում է տարեկան 2,5 միլիարդ փող և օրինակ` 250 միլիոնով տրանսֆերտների ավելացումը կազմում է այդ թվի տասը տոկոս է կազմում, այսինքն` տրանսֆերտները կակտիվացնեն առևտուրը, արտադրությունը կխթանեն:
Անդրադառնալով Ռուսաստանի Առևտրի համաշխարհային կազմակերպությունից դուրս գալու հնարավորությանը` տնտեսագետն ասաց, որ դա լավ ցուցանիշ չի լինի առաջնահերթ այն պատճառով, որ ԵԱՏՄ համակարգի մեջ մաքսային օրենսգրքում հիմնական սկզբունքները առևտրի համաշխարհային կազմակերպության սկզբունքներն են:
«Այսինքն` մեզ համար ձեռնտու է, որ Ռուսաստանը նույն համակարգի մեջ լինի մեզ հետ, քանի որ, եթե Ռուսաստանը հանկարծ դուրս եկավ կամ շեղվեց այդ գծից, կձգտի անպայման ԵԱՏՄ անդամների համար իր ուզած թելադրանքները կիրառել կամ այլ մեխանիզմներ գտնել, որը կարող է մեզ համար խոչընդոտներ առաջացնել թե մյուս երկրների հետ առևտրում, թե ԵՄ-ի հետ կապված հարաբերություններում»,-ասաց նա: