Ռուսաստանը փափուկ բարձ է դնում Հայաստանի գլխի տակ, մենք չենք կարող մեր անվտանգությունը թողնել ռուսների քմահաճույքին. Ռուբեն Մեհրաբյան
Պետք է արձանագրել, որ այն, ինչ Երևանում հայտարարեց Կոսաչովը, պարզապես երեսպաշտություն է:
Այս մասին Tert.am-ի հետ զրույցում ասաց վերլուծաբան Ռուբեն Մեհրաբյանը՝ խոսելով ՌԴ Դաշնային ժողովի Դաշնության խորհրդի միջազգային գործերով կոմիտեի նախագահ Կոնստանտին Կոսաչովի հնչեցրած մտքի մասին, թե Ռուսաստանը չի շարունակի նույն մասշտաբներով սպառազինություն մատակարարել Ադրբեջանին, որը կար մինչև 2016թ. ապրիլյան պատերազմը:
«Մենք պարտավոր ենք անել դա այդ պայմանագրերին համապատասխան: Սակայն, իմ ունեցած տեղեկատվությամբ, դա չի լինի այն մասշտաբներով, որը կար 2016թ. ապրիլի դրությամբ: Անկասկած, մենք արձագանքում ենք իրավիճակին, որը տեղի ունեցավ 2016թ. ապրիլին»,- ասել էր ռուսաստանցի պաշտոնյան:
Ռուբեն Մեհրաբյանը նշեց, որ Կոսաչովն այսպիսով փորձեց «փափուկ բարձ դնել Հայաստանի գլխի տակ»:
«Ռուսաստանը, կարծում եմ, շարունակելու է իր կեղտոտ գործը: Գուցե ոչ այն ծավալով, ինչ առաջ, բայց շարունակելու է: Ամեն դեպքում, նրանք մատակարարել են այնքան շատ զենք ու զինամթերք, որ 2016թ.-ի ապրիլին մենք տեսանք, թե ինչ հետևանք ունեցավ այն: Ադրբեջանը որդեգրում է մաքսիմալիստական, ոչ իրատեսական, չափազանց ագրեսիվ դիրքորոշում, որովհետև ունի շատ զենք: Իրավիճակն անկայունության ռեժիմում մնում է կառավարելի Ռուսաստանի կողմից: Իրենք հասել են այս նպատակին, ու հիմա փափուկ բարձ են դնում Հայաստանի գլխի տակ»,- նշեց Ռուբեն Մեհրաբյանը:
Վերլուծաբանն ընդգծեց, որ Ռուսաստանն ուզում է մեղմել այն ցասումը, որը կա Հայաստանում, որն արտահայտվում է իշխանությունների կողմից:
«Այս ամենին պետք է վերաբերվել փիլիսոփայորեն, թույլ չտալ, որ Կոսաչովները, Իվանովները կամ մյուսները փորձեն թերագնահատել հայերի մտավոր ունակությունները: Իսկ Հայաստանում շատ լավ հասկանում են, որ Ռուսաստանը բարձ է դնում մեր գլխի տակ»,- ասաց Մեհրաբյանը:
Քանի որ, ըստ նրա, Հայաստանը լավ հասկանում է, որ Ռուսաստանը շարունակելու է այս վարքագիծը, փորձում է դիվերսիֆիկացնել իր արտաքին, պաշտպանական քաղաքականությունը տարբեր ուղղություններով:
«Մենք չենք կարող մեզ շռայլություն թույլ տալ, մեր անվտանգությունը թողնել Ռուսաստանի քմահաճույքին: Ռազմական դիսբալանսն Ադրբեջանի մոտ ստեղծելու է այն իլյուզիան, որ իրենք կարող են ուժի կիրառմամբ լուծել ղարաբաղյան հակամարտությունը: Դրա համար էլ բանակցությունների սեղանին իրենց լկտի են պահում, դրանց անլուրջ են վերաբերվում: Իսկ Հայաստանը պետք է ցույց տա, որ եթե փորձեն ուժ կիրառել, իրենց ատամները փշրվելու են»,- շեշտեց Ռուբեն Մեհրաբյանը: