«Ստարտափ Արմենիա» հիմնադրամը և FAST-ը կհամագործակցեն «Սևան Ստարտափ Սամմիթ 2018»-ի շրջանակներում
«Սևան Ստարտափ Սամմիթ 2018»-ը, որը կազմակերպվում է «Ստարտափ Արմենիա» հիմնադրամի և «Granatus Ventures»-ի կողմից, տեղի կունենա հուլիսի 22-ից 29-ը Սևանա լճի ափին։ Սամմիթ 2018-ը հանդես կգա բազում նորամուծություններով։
Երկու տարի անընդմեջ Սևանի ափին անցկացվելուց հետո, «Սևան Ստարտափ Սամմիթ»-ը, որպես «Սիսայդ Ստարտափ Սամմիթ» դուրս եկավ միջազգային հարթակ։ 2018թ-ին արդեն Սամմիթն անցկացվել է ԱՄԷ-ում և Հնդկաստանում և իր ներդրումն ունեցել տեղի ստարտափ էկոհամակարգերի զարգացման մեջ։
«Սևան Ստարտափ Սամմիթ 2018»-ը իր կազմակերպչական և բովանդակային նորամուծություններով բավականին կտարբերվի նախորդ տարիների սամմիթներից և կլինի մինչ այս տեղի ունեցած արտասահմանյան սամմիթների գալա միջոցառումը։ Սամմիթի նորամուծությունների հիմքում միջազգային փորձի փոխանակումն է։ Այս տարի մասնակիցները կունենան ավելի հագեցած օրակարգ, սակայն ավտոմատացման նորագույն տեխնոլոգիաների ներդրմամբ այն կլինի շատ ավելի թեթև, ճկուն արդյունավետ մասնակիցներին ընդձեռնված հնարավորությունների տեսանկյունից։ Մասնակցության տարբեր կարգավիճակ ունեցող թիմեր և անհատներ կանցկացնեն սամմիթյան 7 օրեր՝ իրար սերտորեն առնչվող, բայց միևնույն ժամանակ զուգահեռ տարբեր սկզբունքներով մշակված օրակարգով։
«Մենք ցանկանում ենք «Սևան Ստարտափ Սամմիթ»-ը դարձնել հայկական ստարտափ էկոհամակարգի բոլոր դերակատարների համատեղ գործունեության տարածք և նպատակ ունենք ապագայում այն դարձնել նաև համաշխարհային ստարտափ էկոհամակարգի կարևոր դերակատարների հանդիպման վայր»,- ասել է «Ստարտափ Արմենիա»-ի հիմնադիր Հակոբ Հակոբյանը։
«Սևան Ստարտափ Սամմիթ 2018»-ի ընթացքում FAST-ը հանդես կգա "FASTathon" («ՖԱՍԹաթոն») նոր ձևաչափով: Մոտ 100 ընտրված երիտասարդներ կձևավորեն թիմեր նոր գաղափարներ ստեղծելու և իրագործելի բիզնես հայեցակարգեր դարձնելու նպատակով: Լավագույն հայեցակարգերը կպարգևատրվեն FAST-ի կողմից:
FAST-ը կհրավիրի միջազգային մենթորների և հյուրերի՝ համալրելով «Սևան Ստարտափ Սամմիթ 2018»-ի անվանի բանախոսների ցանկը: Սամմիթ 2018-ի հատուկ հյուրն է FAST-ի համահիմնադիր Ռուբեն Վարդանյանը:
Ավելին, «Սևան Ստարտափ Սամմիթ 2018»-ի մասնակից ստարտափերը ներդրում ստանալու նպատակով իրենց բիզնես ծրագրերը կներկայացնեն FAST-ի նախաձեռնությամբ ստեղծված «Հրեշտակների ցանց»-ին:
«Սամմիթ 2018-ին նոր ձևաչափով հանդես գալը միտված է նորարարական էկոհամակարգի և ստարտափային մշակույթի զարգացմանը», - ընդգծել է FAST-ի գործադիր տնօրեն Արմեն Օրուջյանը:
Այս նորամուծություններին զուգահեռ սամմիթի նախորդ տարիների ձևաչափը կշարունակի մնալ կենտրոնականը։ Սամմիթին կարող են դիմել և մասնակցել զարգացման տարբեր մակարդակներում գտնվող ստարտափներ աշխարհի բոլոր երկրներից՝ անկախ գործունեության ոլորտից։ Նրանք՝ բացի մրցույթներից, հնարավորություն կստանան իրենց պրոյեկտները ներկայացնել ներդրողներին և ստանալ ներդրումներ։ Սամմիթի մրցանակային ֆոնդը կգերազանցի 50,000 ԱՄՆ դոլարը։
Հիշեցնենք, որ Սամմիթին դիմելու վերջնաժամկետը այս տարի կփակվի ավելի շուտ քան նախորդ տարիներին մասնակցության ուղեգիր ստացած ստարտափների սամմիթին ավելի լավ նախապատրաստելու համար։ Մանրամասն տեղեկությունների համար այցելեք՝ www.sss.am :