Որքան խորհրդարանի անցողիկ շեմն իջեցվի, այդքան ավելի հաճախակի կլինի ճգնաժամերի խնդիրը. Ս. Մարգարյան
Որքան խորհրդարանի անցողիկ շեմն իջեցվի, այդքան ավելի հաճախակի կլինի ճգնաժամերի խնդիրը. փոքր խմբակցությունները շատ կլինեն, ինչը կբարձրացնի և կնպաստի ճգնաժամերին: Tert.am-ի հետ զրույցում նման կարծիք հայտնեց ԱԺ ԲՀԿ խմբակցության նախկին պատգամավոր Ստեփան Մարգարյանը: Ըստ նրա՝ խորհրդարանական կառավարման համակարգում ճգնաժամը պարտադիր ատրիբուտ է, իսկ որքան շեմը փոքրանա, այդքան դա նպաստելու է ճգնաժամերի առաջացմանը: «Եթե շատ-շատ խմբակցություններ լինեն Ազգային ժողովում, արդեն կառաջանան 1-2 կամ 2-3 հոգանոց կոալիցիաներ: Այս դեպքում ճգնաժամերը հաճախակի կդառնան, դա երկրի համար այդքան էլ լավ չէ իրականում»,- նշեց Ստեփան Մարգարյանը:
- Կառավարությունում և Ազգային ժողովում տարբեր հանձնաժողովներում քննարկվում է Ընտրական օրենսգրքի փոփոխությունների հարցը: Դեռևս քննարկման առարկա են հիմնական երկու դրույթներ՝ ամբողջովին փակ համամասնական ընտրակարգին անցնելը և խորհրդարանի անցողիկ շեմի իջեցումը: Այս փոփոխությունների հետ կապված Ձեր կարծիքն ինչպիսի՞ն է:
- Նախ մի քիչ անհասկանալի է, թե ինչու է երկու հանձնաժողով աշխատում, և հետո ինչպես են համադրելու: Լավ կլիներ, որ գուցե միասնական մեկ հանձնաժողով աշխատեր, մի քիչ տարօրինակ է երկու հանձնաժողովի զուգահեռ աշխատելը: Ինչ վերաբերում է հիմնական դրույթներին, այդ մասին ժամանակին շատ ենք խոսել: Այն համակարգը՝ ռեյտինգային, որը ձևավորվել էր, իհարկե, անհեթեթություն էր: Այն կոռուպցիայի և խախտումների բուն էր, և դա պետք է վերանա, երկրորդ կարծիք լինել չի կարող այստեղ: Ես այս մասին ժամանակին շատ եմ խոսել, երբ ընտրակարգերի հարցը նոր էր քննարկվում, և այժմ ոչ միայն ինչ-որ բան տեղի չի ունեցել, այլ տեղի է ունեցել այն, ինչը ապացուցել է, որ դա սխալ էր: Եղած ընտրությունները ցույց տվեցին, որ դա ոչ միայն սխալ է, այլ նաև վտանգավոր է:
- Իսկ խորհրդարանի անցողիկ շեմի իջեցմանն ինչպե՞ս եք վերաբերում: Նախատեսվում է, որ կուսակցությունների դեպքում շեմը 5 տոկոսից պետք է իջեցվի 4-ի, իսկ դաշինքների դեպքում՝ 7-ից 5 տոկոսի:
- Գիտեք, շեմի իջեցնելու խնդիրը պետք է նայել ընդհանրապես այլ կոնտեքստում ևս: Հիշո՞ւմ եք այն քննարկումները, որոնք կային Սահմանադրությունից առաջ, և իշխանությունների կողմից արհեստական ձևով մտցվեց կայուն մեծամասնության սկզբունքը: Դա պատճառաբանվում էր նրանով, որ եթե դա չլինի, ապա հաճախակի ճգնաժամեր կառաջանան: Մի քանի անգամ առիթ եմ ունեցել ասելու, որ խորհրդարանական համակարգն իր հետ բերում է նաև այդ ճգնաժամերը, այդ համակարգը դա է ենթադրում: Ես հիմա մտածում եմ, որ շեմը ինչքան իջեցվի, այդքան ավելի հաճախակի կլինի ճգնաժամերի խնդիրը: Եթե շատ-շատ խմբակցություններ լինեն Ազգային ժողովում, արդեն կառաջանան 1-2 կամ 2-3 հոգանոց կոալիցիաներ, դրանք ինչպիսի կոալիցիաներ կլինեն: Ի վերջո, ես կարծում եմ, մենք պետք է ազատվենք այն դրույթից, որ կոալիցիա կարելի է կազմել 2-3 խմբակցություններով: Դա ևս շատ արհեստական կայուն մեծամասնություն ստեղծելու համար է և թույլ չտալու, որ փոքր խմբակցությունները հավաքվեն և կոալիցիա կազմեն: Սրա վերանալը կբերի նրան, որ փոքր թվով խմբակցությունները շատ կլինեն, ինչը կբարձրացնի և կնպաստի ճգնաժամերին:
- Հիմա շեմի իջեցումը լա՞վ է, թե՞ վատ:
- Դա մի քիչ լավ չէ: Խորհրդարանական կառավարման համակարգում ճգնաժամը պարտադիր ատրիբուտ է, դու չես կարող ընդունել խորհրդարանական կառավարման համակարգ և վերացնես ճգնաժամերը, դա հնարավոր չէ: Հիմա ենթադրենք՝ եթե շատ-շատ լինեն խմբակցություններն Ազգային ժողովում, և այդ ճգնաժամերը հաճախակի դառնան, դա երկրի համար այդքան էլ լավ չէ իրականում: Այսինքն՝ պետք է համադրել՝ եթե իջեցնելու ենք, ինչքան իջեցնենք, որ շատ չլինեն այդ խնդիրները: 5 տոկոսն այդքան մեծ չէ իրականում: Կարծում եմ, որ շատ իջեցնելն այդքան էլ ցանկալի չէ, որովհետև ինչքան փոքրանա խմբակցությունների թիվը, այդքան նպաստելու է ճգնաժամերի առաջացմանը:
- Ձեր քաղաքական ուժը՝ «Համախմբում» կուսակցությունը, ի՞նչ ձևաչափով է մասնակցելու արտահերթ խորհրդարանական ընտրություններին, արդեն հստակ որոշում կա՞:
- «Համախմբում» կուսակցությունը տևական ժամանակ է, չի գործում: Ես և իմ ընկերները մեր գործունեությունը ծավալում ենք հիմա «Այլընտրանքային նախագծեր» խմբի շրջանակներում, իսկ քաղաքական գործունեությունը հետագայում, դեռ չունենք պատասխան, կորոշենք:
- Դուք և Ձեր ընկերները «Համախմբում» կուսակցության կորի՞զն եք:
- Նախկին պատգամավորներ Վահե Հովհաննիսյանը, Էլինար Վարդանյանը և Top-news լրատվականից Գեղամ Նազարյանը: Հիմնականում այս խմբով ենք մեր գործունեությունը ծավալում:
- Իսկ քննարկումներ անցկացնո՞ւմ եք ինչ-որ քաղաքական ուժերի հետ՝ նրանց ցուցակով ընտրություններին մասնակցելու համար:
- Այս պահին այդպիսի բան չկա: Ինչպիսին կլինի առաջիկայում, դժվարանում եմ ասել:
- Սամվել Բաբայանի հետ հանդիպե՞լ եք նրա ազատ արձակվելուց հետո, ի՞նչ քննարկումներ եք ունեցել:
- Սամվել Բաբայանի ազատ արձակվելուց հետո որպիսությունն ենք հարցրել և մեր ուրախությունն ենք հայտնել, որ նա ազատության մեջ է:
- Նախորդ ընտրություններում Սամվել Բաբայանը Ձեր քաղաքական ուժին էր սատարում, և հետաքրքիր է, առաջիկա արտահերթ ընտրություններում հնարավո՞ր է նորից միասին տեսնենք Ձեզ՝ Ձեր նշած պատգամավորներին և Սամվել Բաբայանին:
- Սամվել Բաբայանի հետ քաղաքական քննարկում չենք ունեցել, ընդհանրապես, այս պահին մենք որևէ քաղաքական ուժի հետ համագործակցելու քննարկում չենք անում: