ԱՄՆ-ն ավելի քան 21 մլն դոլար կծախսի Թել Ավիվից Երուսաղեմ տեղափոխված ԱՄՆ դեսպանատան կառուցման համար
Միացյալ Նահանգները պատրաստվում է Թել Ավիվից Երուսաղեմ տեղափոխված ԱՄՆ դեսպանատան կառուցման համար ավելի քան 21 մլն դոլար ծախսել։ Ինչպես հայտնում է «ՌԻԱ Նովոստի» գործակալությունը, այդ մասին են վկայում կառավարության կայքում հրապարակված տվյալները։
Ինչպես նշվում է կայքում, ԱՄՆ պետքարտուղարությունն ավելի քան 21 մլն 182 հազ. դոլար արժողությամբ պայմանագիր է կնքել Desbuild Limak D&K ընկերության հետ։
Ինչպես նշում է ABC հեռուստաալիքը, այս գումարը գրեթե 100 անգամ գերազանցում է այն գումարը, որի մասին սկզբնապես հայտարարել էր ԱՄՆ նախագահ Դոնալդ Թրամփը։ Հիշեցնենք, որ մարտին նա հայտարարել էր, որ դեսպանատունը «կկառուցվի շատ արագ ու շատ էժան»՝ մոտ 250.000 դոլարով։
Հիշեցնենք, որ նախորդ տարվա դեկտեմբերին Թրամփը Երուսաղեմն Իսրայելի մայրաքաղաք է ճանաչել ու հայտնել ամերիկյան դեսպանատունն այնտեղ տեղափոխելու մասին։ Տեղափոխությունը տեղի է ունեցել մայիսի 14-ին՝ Իսրայելի կազմավորման 70-ամյակի օրը։