Հայաստանը պետք է բարելավի զբոսաշրջային ենթակառուցվածքները և պատշաճ որակի ծառայություններ մատուցի. վարչապետ
Վերջին 3 ամսվա ընթացքում նախորդ տարվա համեմատ 35 հազարով ավելի շատ մարդ է մտել Հայաստան: Այսօր ֆեյսբուքյան ուղիղ եթերի ժամանակ նման հայտարարություն է արել ՀՀ վարչապետ Նիկոլ Փաշինյանը՝ նկատելով, որ ՀՀ-ում զբոսաշրջությունը զարգանում է:
Նա նաև կարևորել է, որ այս տարի, ի տարբերություն նախորդ տարվա, մեկնածների ու ՀՀ եկածների թվի մեջ շեշտակի տարբերություն կա, այսինքն՝ 29 հազար ավել է եկածների թիվը երկրից մեկնածների թվից: Ըստ նրա՝ մարդիկ գալիս են ՀՀ ու բնակարան գնում:
«Երեկ սրճարանում հանդիպեցի Քուվեյթից եկած մեր հայրենակցին, և առաջին հարցը, ոը տվեցի սա էր՝ արդյոք բնակարան գնել է ՀՀ-ում, և նրանք հաստատեցին, որ գնել են: Ի դեպ, առիթից օգտվելով ասեմ, որ երբ եկել էր, խոստացավ, որ Հայաստանում, անպայման, բնակարան է գնելու: Չգիտեմ՝ առել է, թե ոչ, բայց հրապարակային ասում եմ՝ հույս ունեմ կտեսնի սա»,-ասել է նա: Ապա դիմելով աշխարհահռչակ երաժիշտ Սերժ Թանկյանին՝ նա նշել է. «Հրապարակային եմ հիշեցնում, Սե՛րժ ջան, մենք պայմանավորվել ենք, էլ չեմ ասում, որ պիտի քննարկեինք Հայաստանում ավելի երկար ժամանակ անցկացնելու հնարավորությունդ»:
Վարչապետը կարծում է, որ զբոսաշրջության ակտիվացմամբ էականորեն ուժեղանում ու զարգանում է փոքր և միջին բիզնեսը: Նրա կարծիքով՝ Հայաստանը պետք է բարելավի զբոսաշրջային ենթակառուցվածքները և պատշաճ որակի ծառայություններ մատուցի:
«Շատ կարևոր է, որպեսզի մենք զբոսաշրջությունը խթանենք: Լուրջ փոփոխություն է նկատվում զբոսաշրջության բնագավառում, և հույս ունեմ, որ զբոսաշրջային մեր ենթակառուցվածքները կլավանան, և շատ կարևոր է, որ մենք պետք է պատշաճ որակի ծառայություններ մատուցենք»,- ասել է Նիկոլ Փաշինյանը:
Վերջինս համոզված է, որ չպետք է միայն թիրախավորել տարբեր միջազգային հեռուստաալիքներով Հայաստանի մասին հոլովակներ ցուցադրելը, քանի որ զբոսաշրջության ամենամեծ գովազդն այն է, որ զբոսաշրջիկի համար հաճելի լինի Հայաստանում անցկացրած ժամանակը:
«Ամենամեծ գովազդն այն է, երբ զբոսաշրջիկը գալիս է Հայաստան, և նրան դուր է գալիս այստեղ անցկացրած ժամանակը, սպասարկումը և մնացածը: Երբ նա վերադառնում է հայրենիք, իր ընկերներին, բարեկամներին, սոցիալական ցանցի միջոցով տեղեկացնում է մեր երկրի մասին»,- շարունակել է վարչապետը:
Նիկոլ Փաշինյանը իր խոսքում նաև կոչով է դիմել փոքր և միջին բիզնեսի ներկայացուցիչներին՝ հորդորելով այս գործառույթները հաշվի առնել: