Թրամփը թույլ է տվել որոշ երկրների առավել հեշտացված տարբերակով պողպատ ու ալյումին ներկրել ԱՄՆ
Միացյալ Նահանգների նախագահ Դոնալդ Թրամփը նոր փաստաթուղթ է ստորագրել, որով հեշտացնում է որոշ երկրներից ալյումինի և պողպատի ներկրումն ԱՄՆ, գրում է «Ինտերֆաքս»-ը՝ հղում անելով ԱՄՆ առևտրի նախարարության փոխանցած տեղեկություններին։
Մասնավորապես՝ քվոտաներ են սահմանվել Հարավային Կորեայից, Բրազիլիայից ու Արգենտինայից ներմուծվող որոշակի քանակի ապրանքի համար, որոնք չեն ենթարկվի բարձրացված մաքսատուրքերով հարկման։
Հրապարակված փաստաթղթում նշվում է, որ տվյալ երկրներից ընկերությունները կարող են դիմումներ ներկայացնել ԱՄՆ տվյալ ապրանքները ներմուծելու համար, եթե դրանք «իրենց որակով ու քանակով չեն ապահովվում պողպատի և ալյումինի ամերիկյան արտադրողների կողմից»։
Հիշեցնենք, որ այս տարվա մարտին Դոնալդ Թրամփը հայտարարել էր արտասահմանից Միացյալ Նահանգներ պողպատի և ալյումինի ներկրման համար մաքսատուրքեր սահմանելու մասին: Մասնավորապես՝ պողպատի համար սահմանվել էր 25%-ի, իսկ ալյումինի համար 10%-ի չափով մաքսատուրք։ Նրա այս քայլը խիստ քննադատության էր արժանացել հատկապես Եվրամիության անդամ երկրների կողմից։