ՀՀԿ-ականների կողմից ստորագրվելիք հնարավոր հուշագիրը, որ անվստահություն չեն հայտնի Փաշինյանին ու նոր թեկնածու չեն առաջադրի, քաղաքական կատեգորիա չէ․ Ա. Բադալյան
Քաղաքական ու ընտրական տեխնոլոգիաների հարցերով փորձագետ Արմեն Բադալյանի գնահատմամբ՝ ՀՀԿ-ականների կողմից ստորագրվելիք հնարավոր հուշագիրն այն մասին, որ անվստահություն չեն հայտնի Փաշինյանին ու նոր թեկնածու չեն առաջադրի, քաղաքական կատեգորիա չէ։
Tert.am-ի հետ զրույցում Արմեն Բադալյանն ասաց․
«Ցանկացած հուշագիր ցանկացած վայրկյանին կարող է չեղյալ հայտարարվել։ Դա Սահմանադրություն չէ, որ իրավական ուժ ունենա, և դրա չեղյալ հայտարարելը հետևանքներ ունենա. հուշագիրը ստորագրում ես, կարող ես նույն վայրկյանին չեղյալ հայտարարել։ Այսինքն՝ դա նույնն է, որ ոչ մի բան չի ստորագրվում։
Հիշեցնենք, որ երեկ «Հրապարակը» տեղեկացրել էր, որ ՀՀԿ-ականները համաձայն են, որ, ինչպես գրված է Կառավարության ներկայացրած ծրագրում՝ մեկ տարի հետո արտահերթ խորհրդարանական ընտրություններ լինեն, որին էլ իրենց որոշ անդամներ կողմ են քվեարկել, ըստ այդմ՝ արտահերթ ընտրությունները պետք է անցկացնել մայիսին, և եթե կարիք կա՝ իշխանությունների հետ հուշագիր կստորագրեն, որ այդ ժամանակ իրենք ոչ միայն անվստահություն չեն հայտնի վարչապետին, այլև նոր թեկնածու չեն առաջադրի՝ Փաշինյանի հրաժարականի դեպքում։
Իսկ հանրապետականների վերջին օրերի ընդգծումները, որ ԱԺ-ն լուծարելու հիմք չեն տեսնում, սակայն պատրաստ են քննարկել հարցը, մանավանդ, որ իրենք էլ հարցեր ունեն տալու, ո՛չ այո է, ո՛չ ոչ։
«Կառավարությունն այդ հարցը, բնականաբար, պետք է բերի ԱԺ, և երբ տվյալ քաղաքական ուժն ասում է, որ պատրաստ է քննարկելու, դա չի նշանակում, որ ասում է այո կամ ոչ ։ Ընդամենը՝ ոչնչի չպարտավորեցնող քննարկում»,- մեկնաբանեց Արմեն Բադալյանը։
Բնականաբար, ՀՀԿ-ականների համար ամենաընդունելի տարբերակը կարող էր լինել մինչև 2022 թվականը, այսինքն՝ ԱԺ-ի չլուծարումն առհասարակ։
Արմեն Բադալյանն ասում է, որ նման բան չի կարող լինել, և որ խորհրդարանն այլևս անիմաստ է պահելը։
«Որովհետև դա այն տեղը չէ, որ պատգամավորները գնան ու ընդամենը աշխատավարձ ստանան, խորհրդարանը նրա համար է, որ այնտեղ լինեն մրցունակ ուժեր, որպեսզի երկիրը կարողանան այս վիճակից հանել։ Երկրորդ․ այսօրվա խորհրդարանում հստակ չէ՝ ով է իշխանություն, ով՝ ընդդիմություն, ինչը ցույց տվեց ԱԱԾ և ՀՔԾ պետերի հեռախոսային խոսակցության գաղտնալսման շուրջ ձևավորված քննիչ հանձնաժողովի ստեղծման գործընթացը, երբ հանձնաժողովի նախագահը հարց էր տալիս՝ ո՞վ է ընդդիմություն, ո՞վ պետք է լինի հանձնաժողովի նախագահի տեղակալը և այսպես շարունակ։ Եվ երրորդ. վարչապետի կողմից իրականացվող սոցիալ-տնտեսական քաղաքականության, բարեփոխումների համար՝ իրականացվող և իրականացվելիք, անհրաժեշտ է լինելու ներկայացնել օրենքի համապատասխան նախագծեր, և դրանք, պարզ է, որ ենթարկվելու են հանրապետականների կողմից լուրջ քննադատության։ Եվ եթե նրանք անգամ ասեն, որ ինչ բերեք, մենք կքվեարկենք, դա ոչինչ չի նշանակի, որովհետև այդպես կստացվի, որ նրանք լավություն են անում Կառավարությանը, բայց ոչ հասարակությանը: