Բրազիլիայում տասնյակ հազարավոր կանայք դուրս են եկել աջ ծայրահեղական թեկնածուի դեմ ցույցի
Բրազիլիայում տասնյակ հազարավոր կանայք դուրս են եկել աջ ծայրահեղական թեկնածու Ժաիր Բոլսոնարուի դեմ բողոքի ցույցի: Նա համարվում է նախագահական ընտրություններում ֆավորիտ թեկնածուն, գրում է Reuters գործակալությունը:
Ակցիայի մասնակիցները դուրս են եկել Ele Nao («ոչ նա») գրությունով պաստառներով, այդ խոսքը դարձել է նրանց հիմնական կարգախոսը:
Բոլսոնարուն, ով մեկ ամիս առաջ դարձել է դանակով հարձակման զոհ, առաջատար դիրք է զբաղեցնում հասարակական կարծիքի հարցումներում: Նրան պատրաստ է իր ձայնը տալ հարցման մասնակիցների 28 տոկոսը, նրան հաջորդում է Ֆերնանդո Հադադը՝ 22 տոկոս ձայնով:
Նախկին կապիտան Ժաիր Բոլսոնարուն բազմիցս առաջացրել է հասարակության վրդովմունքը՝ իր հոմոֆոբ և կնատյաց հայտարարություններով: Նա պաշտպանել է սեռական հիմքով աշխատավարձերի տարբերությունը, կին կոնգրեսականներից մեկին ասել է, որ նա չարժե, որ իրեն բռնաբարեն, ինչպես նաև միասեռականությունը համեմատել է մանկապղծության հետ:
Բոլսոնարուն գրավել է միլիոնավոր քրիստոնյաների աջակցությունը՝ ակտիվ հանդես գալով աբորտների դեմ: 63-ամյա քաղաքական գործիչն իր սկանդալային ելույթների շնորհիվ ստացել է «բրազիլացի Դոնալդ Թրամփ» անունը: