Ադրբեջանի Միջազգային բանկի նախկին ղեկավարի կինը Լոնդոնի մեկ խանութում միայն 21 մլն դոլար է ծախսել
Մեծ Բրիտանիայի նոր հակակոռուպցիոն օրենքի առաջին թիրախն Ադրբեջանի Միջազգային բանկի նախկին նախագահի կինն է դարձել՝ Զամիրա Հաջիևան, որը Լոնդոնի խանութներից մեկում միայն 16 մլն ֆունտ ստերլինգ ($21,000,000) է ծախսել:
Ինչպես հայտնում է BBC-ն, խոսքը Harrods խանութում մեկ տասնամյակի ընթացքում կատարած գնումների մասին է: Հաջիևային չի հաջողվել օրենքի շրջանակներում անանուն մնալ, երբ ԶԼՄ-ները պնդել են, որ հանրությունը պետք է տեղյակ լինի ողջ տեղեկատվությանը:
Այժմ նա կարող է կորցնել լոնդոնյան խանութի մոտակայքում գտնվող իր 15 մլն ֆունտ արժողությամբ տունն ու Բերքշիրի գոլֆի դաշտը, եթե չկարողանա դատարանում պարզաբանել իր հարստության աղբյուրը:
Միացյալ Թագավորության «Անբացատրելի հարստության մասին» առաջին օրենքի համաձայն՝ 55-ամյա ադրբեջանուհին պետք է Ազգային քրեական գործակալությանը տեղեկություն տրամադրի, թե ինչպես են ինքն ու իր ամուսինը՝ Ջահանգիր Հաջիևը, կարողացել գնել իրենց մեծ տունը Լոնդոնի թանկարժեք թաղամասում: