Կոլորադոյի նախկին նահանգապետը դուրս է եկել ԱՄՆ նախագահի պաշտոնի համար նախընտրական պայքարից
ԱՄՆ Կոլորադո նահանգի նախկին նահանգապետ Ջոն Հիքենլուփերը 2020-ին կայանալիք ընտրություններից առաջ հրաժարվել է Դեմոկրատական կուսակցության նախընտրական քարոզարշավի հետագա մասնակցությունից: Համապատասխան հայտարարություն քաղաքական գործիչը հինգշաբթի հրապարակել է իր թվիթերյան էջում:
«Այսօր առավոտյան հայտարարել եմ, որ այլևս չեմ մասնակցելու նախագահի պաշտոնի համար պայքարին: Չնայած, որ այս նախընտրական քարոզարշավը արդյունք չի տվել, որի հույսը մենք ունեինք, դրա ամեն մի պահն արժեր պայքարին, և ես շնորհակալություն եմ հայտնում յուրաքանչյուրին, ով աջակցում էր այդ արշավին և մեր ողջ թիմին»,- գրել է Հիքենլուփերը:
Հիշեցնենք, որ ավելի վաղ ամերիկյան պարբերականներից մեկը հոդված էր հրապարակել՝ նշելով, որ ԱՄՆ-ում 2020-ին կայանալիք ընտրություններում գրանցված նախագահի թեկնածուներից մի քանիսն աջակցում են Հայոց ցեղասպանության բանաձևին, մասնավորապես՝ Մասաչուսեթս նահանգից սենատոր Էլիզաբեթ Ուորենը, Կալիֆոռնիա նահանգից կրտսեր սենատոր Քամալա Հարիսը, կոնգրեսականներ Թուլսի Գաբարդը՝ Հավայի նահանգից և Սեթ Մոլթոնը՝ Մասաչուսեթս նահանգից, ընդ որում նախագահի մեկ այլ թեկնածու՝ կոնգրեսական Էրիկ Սուոլուելը, Ցեղասպանության ճանաչման մասին կոչ պարունակող բանաձևը ստորագրել էր 2017-ին: