Մետրոյի ուղևորների քանակը շուրջ 5 անգամ կրճատվել է, երթուղայինների ուղևորահոսքը ևս պակասել է. փոխքաղաքապետ Սերգեյ Հարությունյան (տեսանյութ)
Երևանում գործող բոլոր տրանսպորտաին միջոցները, անկախ սեփականության տեսակից, ամեն օր ախտահանվում են: Այս մասին Կառավարության մամուլի կենտրոնում կայացած մամուլի ասուլիսին հայտարարեց Երևանի քաղաքապետի տեղակալ Սերգեյ Հարությունյանը:
«Առաջին օրվանից կատարվում են կանխարգելիչ աշխատանքներ, և քաղաքային իշխանությունն օրուգիշեր աշխատանքներ է տանում՝ հետևելով Առողջապահության նախարարության և պարետատան տված ցուցումներին»,-ասաց փոխքաղաքապետը:
Դիտարկմանը, թե Երևանի քաղաքային տրանսպորտի, մասնավորապես՝ երթուղայինների վարորդները հիմնականում 60 և ավելի տարեկան են, և այս օրերին մեկուսացել են, ու մի շարք թաղամասերում տրանսպորտի հետ կապված խնդիրներ կան, փոխքաղաքապետն արձագանքեց, թե ուղևորների քանակը ևս նվազել է:
«Եթե մինչ արտակարգ դրություն հայտարարելը Երևանի մետրոպոլիտենն օրական կատարում էր շուրջ 75 000 ուղևորափոխադրում, այս պահին այն շուրջ 15 000 է՝ մոտավորապես 5 անգամ պակաս: Ավտոբուսների դեպքում նախկինում 70 000 ուղևորափոխադրում էր, այժմ՝ 20 000: Նախկինում օրական 850-900 միկրոավտոբուս էր դուրս գալիս երթուղի, այս պահին՝ 500 միկրոավտուբուս»,-ասաց նա ՝ընդգծելով նաև, որ չկա մի թաղամաս, որը զրկվել է տրանսպորտից, պարզապես քանակն է նվազել:
Փոխքաղաքապետի խոսքով՝ վարորդները մինչ երթուղի դուրս գալը ենթարկվում են ջերմափաչման: Նա նշեց նաև, որ ախտահանումներ են իրականացվում քաղաքի բազմաբնակարան շենքերում:
Դիտարկմանը, թե ավտոբուսների, երթուղայինների վարորդներ էլ կան, որոնք դժգոհում են ուղևորահոսքի կրճատումից և հրաժարվում են վարել, արդյո՞ք այդ իրավիճակում քաղաքապետարանն ունի այլընտրանքային տարբերակ՝ ուղևորափոխադրում կատարելու համար, Երևանի քաղաքապետարանի մամուլի խոսնակ Հակոբ Կարապետյանը պատասխանեց, որ Երևան համայնքի ենթակայության տակ գտնվող «Երևանի ավտոբուս» ՓԲԸ-ն ունի ռեզերվային թվով ավտոբուսներ, որոնք պահվում են կոլապսային իրավիճակներում օգտագործելու համար:
Հարցին՝ մայրաքաղաքում քանի՞ մարդու է ցուցված տանը մնալ, որոնք 14-օրյա կարանտինի մեջ են, և ինչպե՞ս է կազմակերպվում նրանց հսկելու գործընթացը, փոխքաղաքապետը պատասխանեց, թե հստակ թիվ չկա այս պահին, բայց այն քաղաքացիները, որոնք եղել են վարակակիրների երկրորդ կարգի կոնտակտավոր, մեկուսացված են կամ ինքնամեկուսացված: Հարությունյանի խոսքով՝ հստակ տվյալներ չկան նաև, թե Երևանի քանի բնակիչ է վարակակիր:
Փոխքաղաքապետը տեղեկացրեց նաև, որ Երևանի քաղաքապետարանի ենթակայության տակ գտնվող պոլիկլինիկական հաստատություններում գործում են ռենտգեն կաբինետներ, որոնք աշխատում են նաև ոչ աշխատանքային օրերին. դրանք անվճար են՝ բայց պարտադիր բժշկի ցուցումով: