«Սրացումներ են ԲՀԿ-ական պատգամավորի մոտ»․ Ալեն Սիմոնյանը արձագանքել է Գևորգ Պետրոսյանին, ով Փաշինյանի պատահական զանգերն անվանել էր «կոմեդիա»
ԱԺ «Բարգավաճ Հայաստան» խմբակցության պատգամավոր Գևորգ Պետրոսյանը ֆեյսբուքյան իր էջում գրառում է կատարել, որում մասնավորապես անդրադարձել է վարչապետ Նիկոլ Փաշինյանի՝ պատահական համարներ հավաքելով քաղաքացիներին զանգահարելուն, որը ուղիղ միացմամբ հեռարձակում էր «Արմնյուզ» ՀԸ-ն։
««Արմնյուզ»-ով կոմեդիա է ցուցադրվում՝ «Զանգ քաղաքացիներին»․․․Նայեք, բայց չվատանաք»,- գրել է պատգամավորը։
Ավելի ուշ Պետրոսյանի սույն գրառմանը ֆեյսբուքյան իր էջում արձագանքել է ԱԺ փոխխոսնակ Ալեն Սիմոնյանը՝ նշելով, որ հարկավոր է քննարկել Պետրոսյանի հոգեբանական սրացման պատճառները։
«Կարծում եմ մենք պետք է շատ լուրջ քննարկենք ԲՀԿ-ան այս «պատգամավորի» հոգեբանական սրացման պատճառները, արդյոք այս սրացումը կապված է կառանտյայի հետ, թե տարիներ շարունակվող ծաղրի հետևանքով հոգեբանական պոռթկում է:
Խոստանում եմ հրապարակավ պարզել»,- գրել է Սիմոնյանը։
Հիշեցնենք, որ վարչապետ Նիկոլ Փաշինյանն այսօր ուղիղ եթերում զանգահարում էր պատահական համարների և զրուցում քաղաքացիների հետ։