Եթե չի հաջողվել բացահայտել, դա դեռ չի նշանակում, որ մենք ոչինչ չենք արել. Ղուլյանը՝ Հայկ Խանումյանին ծեծի ենթարկելու միջադեպի մասին (տեսանյութ)
Արցախի Հանրային հեռուստաընկերության եթերում նախագահի թեկնածուների մասնակցությամբ կայացած հեռուստաբանավեճին Ռուսլան Իսրայելյանը հարց ուղղեց Աշոտ Ղուլյանին: Իսրայելյանը նշեց՝ Ղուլյանը հանդիսանում է մի կուսակցության նախագահ, որի կառավարման տարիներին մենաշնորհային դիրքով սեփականաշնորհվել է երկրի կարևորագույն ստրատեգիական օբյեկտը՝ կապը, ըստ Իսրայելյանի՝ երկիր է մտել հանքարդյունաբերական «Բեսմեթլս» ընկերություն, որը տարիներ շարունակ մեր երկրի հարստությանը դուրս է հանել:
Ռուսլան Իսրայելյանը հետաքրքրվեց, թե ինչ քայլեր է արել Ղուլյանն այս կապակցությամբ, քանի որ նա ԱԺ պատգամավոր է եղել: Ղուլյանը ուղղեց Իսրայելյանին՝ ասելով, որ այդ գործընթացը եղել է 2005 թվականից առաջ, երբ նա չի եղել ԱԺ պատգամավոր:
Ղուլյանը նշեց, որ նա ևս խնդիրներ է տեսնում այդ հարցում, բայց դրանից հետո նման այլ ներդրումներ չեն եղել, և չեն կարող համեմատել այդ ընկերության բացասական կողմերի հետ: «Մեզ համար տնտեսության ճյուղերի զագացումը բերելու է բնապահպանական լուրջ խնդիրների: Սա նշանակում է, որ պետությունը այսօր պարտավոր է լուրջ ֆինանսական հատկացումներ ունենալ»:
Ռուսլան Իսրայելյանը փորձեց նաև ճշտել, թե Ղուլյանն ինչ քայլեր է արել պատգամավոր Հայկ Խանումյանին ծեծի ենթարկելու մասով, թեկնածուն պատասխանեց, որ քննարկումներ են եղել: «Եթե չի հաջողվել բացահայտել, դա դեռ չի նշանակում, որ մենք ոչինչ չենք արել: Արդյունքն այն է, որ Հայկ Խանումյանն այսօր մեզ հետ կանգնած է և նախագահի թեկնածու է»: