Արցախում նախագահական ընտրություններում առաջատարն Արայիկ Հարությունյանն է, նրան հաջորդում է Մասիս Մայիլյանը, ապա Վիտալի Բալասանյանը. թեկնածուի խոսնակ
Այս պահի դրությամբ՝ Արայիկ Հարությունյանն առաջատար է մոտ 56 տոկոսով: Այս մասին նշեց «Ազատ Հայրենիք» կուսակցության ղեկավար, Արցախի նախագահի թեկնածու Արայիկ Հարությունյանի խոսնակ Վահրամ Պողոսյանը՝ ներկայացնելով Արցախի նախագահի ընտրության նախնական ցուցանիշները:
«Մրցակիցների մասով, ըստ մեր տվյալների՝ մշակվել է ձայների մոտ 60 տոկոսը, որում ձայների քանակով պարոն Հարությունյանն առաջատար է: Երկրորդ տեղում Մասիս Մայիլյանն է, եթե չեմ սխալվում՝ մոտ 28 տոկոսով, իսկ շատ ավելի ցածր տվյալներով՝ մոտ 12 տոկոսի սահմաններում, Վիտալի Բալասանյանն է»,- ասաց նա և հավելեց, որ վերջնական արդյունքները երկու ժամից կունենան:
Նշենք, որ ըստ տոկոսների ստացվում է, որ Արայիկ Հարությունյանն ունի 22 000-ից ավել ձայն, Մասիս Մայիլյանը՝ 11 000-ից ավել ձայն, իսկ Վիտալի Բալասանյանը՝ մոտ 5000 ձայն: