Թուրքիան հայտարարել է, որ պատրաստ է պատասխան կրակ բացել Լիբիայում Հաֆթարի բանակի ուղղությամբ
Թուրքիայի արտգործնախարարությունը կիրակի հանդես է եկել հայտարարությամբ՝ պնդելով, որ Լիբիայի ազգային բանակը, որը ենթարկվում է Խալիֆա Հաֆթարին, «ուժեղացրել է հարձակումները», որոնց թիրախում է հայտնվել նաև Տրիպոլիում թուրքական դեսպանությունը:
Ինչպես հաղորդում է ТАСС գործակալությունը, թուրքական գերատեսչության հայտարարության մեջ նշվում է, որ Անկարան պատրաստ է պատասխան կրակ բացել Լիբիայի ազգային բանակի դիրքերի ուղղությամբ նման միջադեպերի կրկնման դեպքում:
«Հաֆթարի հետ կապ ունեցող անօրինական կազմավորումները վերջին օրերին ուժեղացրել են հարձակումները քաղաքացիական անձանց և ենթակառուցվածքների վրա: Միայն մայիսի 9-ին նրանք ավելի քան 100 հրթիռ են արձակել և ինտենսիվ հրետակոծություն են իրականացրել Տրիպոլիի կենտրոնում:
Այդ հարձակումների հետևանքով, որի թիրախը դիվանագիտական առաքելություններն էին, այդ թվում և մեր դեսպանությունը, «Միթիգա» օդանավակայանը և այլ քաղաքացիական ենթակառուցվածքներ, մահացել և վիրավորվել են քաղաքացիական անձինք: Այդ իսկ պատճառով նորից ընդգծում ենք, որ եթե մեր ներկայացուցչությունը կամ մեր շահերը Լիբիայում հարվածի տակ դրվեն, ապա մենք պատասխան կրակ կբացենք Լիբիայում Հաֆթարի բանակի ուղղությամբ»,- ասվում է հայտարարության մեջ: