Վրաստանի նախագահը համարում է, որ երկիրը մոտ ապագայում չի անդամակցելու Եվրամիությանը
Վրաստանի նախագահ Սալոմե Զուրաբիշվիլին համարում է, որ երկիրը մոտ ժամանակներս չի կարողանա անդամակցել Եվրամիությանը: Դրա փոխարեն պետք է մտածել միության հետ համագործակցության խորացման ուղղությամբ: Այս մասին գրում է РИА Новости-ն:
Եվրամիության դռները վաղը չեն բացվելու, դա գիտեն բոլորը: Անդամակցումը մեր այսօրվա առաջադրանքը չէ: Մեր այսօրվա առաջադրանքը հայտնվելն է այնտեղ, որտեղ պետք է լինենք, որպեսզի ստանանք համագործակցության այն մակարդակը, որը համապատասխանում է Վրաստանին: Եվրամիությանն անդամակցումը իրական նպատակ է, և մենք այլ առաջնահերթություն չունենք: Այլ հարց է, որ այսօր, վաղը, հաջորդ շաբաթ, երկու ամիս հետո Եվրամիությունը նոր թեկնածուների և անդամների մասին չի մտածելու, փոխարենն արդեն սկսվել են գործընկերության, ասոցացման նոր ձևաչափի շուրջ խոսակցությունները: Հենց այդտեղ մենք պետք է լինենք շատ պահանջկոտ, քանի որ այսօր մենք անդամակցման համար կատարում ենք այն քայլերը, որոնք վաղը կձևավորվեն ինստիտուցիոնալ կերպով»,- հայտնել է Զուրաբիշվիլին «Ռուսթավի 2» հեռուստաալիքի եթերում հարցազրույցի ժամանակ:
Վրացական իշխանությունները գլխավոր արտաքինքաղաքական առաջնահերթություններ են համարում ՆԱՏՕ-ին և Եվրամիությանն անդամակցումը: Վրաստանը 2014-ին ստորագրել է ԵՄ-ի հետ ասոցացման համաձայնագիր, իսկ 2017-ի մարտին երկրի քաղաքացիները ստացան շենգենյան գոտու երկրներ առանց վիզայի մուտք գործելու հնարավորություն: