Չինաստանի բանակը զորավարժանքներ է սկսել Թայվանի ափերի մոտ
Չինաստանի Ժողովրդաազատագրական բանակը սկսել է մի շարք ռազմագործողություններ և զորավարժանքներ Թայվանի ափերի մոտ՝ հյուսիսային, հարավ-արևմտյան և հարավ-արևելյան հատվածներում;
Ինչպես գրում է ՌԻԱ «Նովոստի»-ն, այս մասին հայտնում է Չինաստանի կենտրոնական հեռուստատեսությունը՝ վկայակոչելով Չինաստանի Ժողովրդաազատագրական բանակի Արևելյան գոտու մարտական հրամանատարության պաշտոնական ներկայացուցիչ Շի Յիին։
«Օգոստոսի 2-ի երեկոյան ՉԺՀ-ի Արևելյան մարտական հրամանատարությունը մի շարք համատեղ ռազմագործողություններ է սկսել Թայվան կղզու շուրջ, ինչպես նաև համատեղ օդային և ռազմածովային զորավարժություններ ծովում և օդային տարածքում Թայվանից դեպի հյուսիս, հարավ-արևմուտք և հարավ-արևելք»,- ասել է Շի Յին։
Հիշեցնենք, որ երեքշաբթի երեկոյան ԱՄՆ Կոնգրեսի Ներկայացուցիչների պալատի նախագահ Նենսի Փելոսիի օդանավը վայրէջք է կատարել Թայբեի Սոնգշան օդանավակայանում։ Չինաստանը հայտարարել է, որ Փելոսիի այցը Թայվան Չինաստանի ինքնիշխանության և տարածքային ամբողջականության լուրջ խախտում է։
Նախօրեին Չինաստանի ԱԳՆ պաշտոնական ներկայացուցիչ Չժաո Լիցզյանը հայտարարել էր, որ Չինաստանի իշխանություններն արդյունավետ ուժ կկիրառեն Փելոսիի Թայվան այցի դեպքում։
«Եթե Փելոսին այցելի Թայվան, դա կլինի կոպիտ միջամտություն Չինաստանի ներքին քաղաքականությանը... և կհանգեցնի շատ լուրջ հետևանքների: Չինաստանի Ժողովրդաազատագրական բանակը ձեռքերը ծալած չի նստի», - ընդգծել էր նա ճեպազրույցում։
Դիվանագետի կարծիքով՝ Փելոսիի այցը Թայվան ապակայունացնի իրավիճակը Թայվանի նեղուցում և հարված կհասցնի Չինաստան-ԱՄՆ հարաբերություններին։
Չինաստանը Թայվանն իր նահանգն է համարում և դեմ է նրա ներկայացուցիչների և այն երկրների իշխանությունների միջև ցանկացած շփման, որոնց հետ Պեկինը դիվանագիտական հարաբերություններ է հաստատել։
Թայվանի հարցը Վաշինգտոնի և Պեկինի հարաբերություններում առանձնակի կարևորություն է ձեռք բերել Ուկրաինայում ստեղծված իրավիճակի ֆոնին։ ՉԺՀ-ն ընդգծում է, որ պատմական և քաղաքական պատճառներով նմանություններ տեղին չեն, և պահանջում է չմիջամտել ներքին գործերին։ ԱՄՆ-ը, պաշտոնապես պահպանելով «մեկ Չինաստանի սկզբունքը» և չունենալով դիվանագիտական հարաբերություններ Թայբեյի հետ, ոչ միայն կապեր է պահպանում կղզու հետ, այլև պարբերաբար զենք է մատակարարում այնտեղ։