Մահացել է Nazareth ռոք խմբի լեգենդար երգիչ Դան ՄքՔաֆերթին
76 տարեկանում մահացել է Nazareth շոտլանդական ռոք խմբի լեգենդար երգիր Դանիել Ուիլյամ «Դան» ՄքՔաֆերթին:
Լուրը խմբի Facebook-ի էջում տեղադրել է Nazareth-ի բաս կիթառահար Փիթ Էգնյուն:
«Դանը մահացել է այսօր 12:40-ին: Մերիէնը (երգչի կինը) և ամբողջ ընտանիքը կորցրել են հրաշալի ամուսնուն և հորը: Ես կորցրել եմ լավագույն ընկերոջս: Աշխարհը կորցրել է երբևէ լսած լավագույն երգիչներից մեկին»,- գրել է Էգնյուն:
ՄքՔաֆերթին, Էգնյուն, Մեննի Չարլթոնը (կիթառ) և Դերել Սվիթը (հարվածող) Nazareth խումբը հիմնադրել են 1968 թվականին Դանֆերմլին շոտլանդական ավանում:
Երիտասարդ շոտլանդացի երաժիշտների համար այն տարիներին ոգեշնչման աղբյուր են եղել The Beatles, The Rolling Stones խմբերը և Բրիտանիայում հաստատված ամերիկացի կիթառահար Ջիմի Հենդրիքսը:
Խմբի ամենահայտնի ալբոմը՝ Hair Of The Dog, թողարկվել է 1975 թվականին:
ՄքՔաֆերթին առողջական խնդիրների բերումով 2013 թվականին հեռացել է խմբից՝ այն բանից հետո, երբ իր մասնակցությամբ ձայնագրվել և թողարկվել է Rock'n'Roll Telephone ալբոմը:
Ռոքերի այցեքարտն անմոռանալի խռպոտ ձայնն էր, առողջությունը՝ թոքերի քրոնիկ օբստրուկտիվ հիվանդությունը, թույլ չէր տալիս 3 ժամ այդ ձայնով երգել:
«Ես կարող էի ևս մեկ ալբոմ գրել, բայց մարդկանցից փող վերցնել, որ գան ու կարճ համերգ տեսնեն՝ ինձ համար անընդունելի կլիներ: Այս հիվանդությունն անկանխատեսելի է, մեկ էլ հասկանում ես, որ չես կարող շնչել»,- Classic Rock հանդեսին 2013-ին ասել է Դան ՄքՔաֆերթին:
Նրա հեռանալուց հետո Nazareth-ը շարունակել է համերգները փոխարինող երգիչների մասնակցությամբ: Ինչպես խմբի անդամներն են ասել, «դա հնարավոր է դարձել միայն Դանի համաձայնությամբ և օրհնությամբ»:
Այդ ժամանակ խմբի կազմում համահիմնադիրներից մնացել է միայն Փիթ Էգնյուն:
2019 թվականին ՄքՔաֆերթին թողարկել է իր հեղինակային ալբոմը՝ Last Treatment:
Nazareth-ի հայտնի հիթերն են Love Hurts, Hair Of The Dog, Razamanaz, This Flight Tonight, Miss Misery երգերը:
Աշխարհահռչակ վետերան և ջահել ռոք աստղերն այս ժամերին ցավակցություն են հայտնում Դան ՄքՔաֆերթիի ընտանիքին, Nazareth-ի երաժիշտներին և խմբի երկրպագուներին: