Թուրքիային օգնելու Հայաստանի մոլուցքն անհիմն է, երբ պարտվել ես բոլոր դաշտերում ու քեզ վիրավորում են. Ռուբեն Մելքոնյան (տեսանյութ)
Թուրքիային օգնելու Հայաստանի մոլուցքն անհիմն է, երբ պարտվել ես բոլոր դաշտերում ու քեզ վիրավորում են:
«Կիզակետում Արկադի Գրիգորյանի հետ» հաղորդման ժամանակ նման տեսակետ է հայտնել թուրքագետ, ԵՊՀ արևելագիտության ֆակուլտետի դեկան Ռուբեն Մելքոնյանը․
«Հումանիտար առումով ընդհանրապես ցավակցելն ու օգնելը ընկալելի քայլեր են։ Սակայն պետք է հաշվի առնել տվյալ երկրի հետ հարաբերությունները և փոխադարձ վերաբերմունքը։ ՀՀ իշխանությունների կողմից արհեստականություն և չափից ավելի ջանքի դրսևորում է նկատվում։ Կարծես թե մոռացել են, որ երկրի հետ գործ ունեն։ Թուրքիան 30 տարի թշնամական քաղաքականություն է վարում, արցախյան առաջին և երկրորդ պատերազմների համամասնակից է, այսօր էլ շարունակում է թշնամական քաղաքականությունը Հայաստանի ու Արցախի նկատմամբ։
ՀՀ իշխանությունները ինչ որ սենտիմենտալ դիվանագիտական կոմբինացիա են մտածել։ Շատ պարզունակ է, որ ցավակցության, օգնության կամ Միրզոյանի այցի միջոցով Երևանը հույս ունի մեղմել Թուրքիայի վերաբերմունքը։ Եթե Թուրքիան այդքան զգացվել է Հայաստանի քայլերից և ուզում է համարժեք քայլ անել, ապա մի քանի օր առաջ Բերձոր միջանցքը պետք է բացվեր»,- ասել է թուրքագետը։
Մելքոնյանն անդրադարձել է երկրաշարժից հետո թուրքական քաղաքականության հնարավոր փոփոխություններին, սպասվող ընտրություններին, Էրդողանի շանսերին և արդյոք Թուրքիայում իշխանության փոփոխությունը կազդի հայ-թուրքական հարաբերությունների վրա։
Հարցազրույցն ամբողջությամբ՝ տեսանյութում․